Landsnet hf hyggst byggja tvær 220 kV háspennulínur milli Hellisheiðar og Þorlákshafnar til að mæta fyrirhugaðri orkuþörf vegna iðnaðaruppbyggingar í Þorlákshöfn. Megin forsendur Landsnets fyrir framkvæmdinni eru fyrirætlanir um uppbyggingu orkufreks iðnaðar í Þorlákshöfn og fyrirhuguð sala raforku af háspennukerfinu.

Til að uppfylla afhendingaröryggi er fyrirhugað að leggja tvær línur. Önnur línan yrði lögð frá tengivirki við Kolviðarhól og hin frá fyrirhuguðu tengivirki á Hellisheiði. Lagðir eru fram tveir valkostir að legu línunnar frá tengivirki á Hellisheiði, og þrír valkostir að legu línu frá tengivirki við Kolviðarhól.

Háspennulínurnar eru matsskyldar skv. 22. tl. í 1. viðauka laga nr. 106/2000 m.s.br. um mat á umhverfisáhrifum, þar sem taldar eru upp framkvæmdir sem ávallt eru háðar mati á umhverfisáhrifum. Verkfræðistofan Línuhönnun verkstýrir mati á umhverfisáhrifum fyrir hönd framkvæmdaraðila. Vinna við mat á umhverfisáhrifum er hafin.

Stefnt er að því að framkvæmdir við línurnar geti hafist haustið 2009 og að þeim verði lokið árið 2010. Þessar tímasetningar geta þó breyst.