Göngubrýr yfir Hringbraut og Njarðargötu
EFLA, ásamt Studio Granda arkitektum, varð hlutskörpust í hönnunarsamkeppni Reykjavíkurborgar og Vegagerðarinnar um hönnun á þremur nýjum göngubrúm yfir Hringbraut og Njarðargötu í tengslum við færslu Hringbrautar. Verkið fól einnig í sér hönnun göngu- og hjólastíga.
Brýrnar hafa vakið athygli bæði hér heima og erlendis. Göngubrýrnar yfir Njarðargötu og Hringbraut hlutu Steinsteypuverðlaunin árið 2010 og viðurkenningu Vegagerðarinnar árið 2009 fyrir gerð og frágang mannvirkja.
Upplýsingar um verkefnið
Verkkaupi
Reykjavíkurborg og Vegagerðin
Verktími
2003-2005
Staðsetning
Reykjavík
Tengiliðir
Magnús Arason Byggingarverkfræðingur M.Sc. Sími: +354 412 6158 / +354 665 6158 Netfang: magnus.arason@efla.is Reykjavík
Baldvin Einarsson Byggingarverkfræðingur Ph.D. Sími: +354 412 6043 / +354 665 6043 Netfang: baldvin.einarsson@efla.is Reykjavík
Um hvað snýst verkefnið
EFLA, í samvinnu við Studio Granda arkitekta, hannaði tvær nýjar göngubrýr yfir nýju Hringbrautina auk nýrrar göngubrúar yfir Njarðargötu. Bogaform brúnna og mýkt í lögun yfirbyggingar þeirra hafa vakið verðskuldaða athygli. Yfirbygging brúnna er úr eftirspenntri steinsteypu, studd af hringlaga súlum úr ryðfríu stáli sem fylltar eru með steinsteypu.
Handrið brúnna var hannað til að gefa létt yfirbragð til samsvörunar við brúargólfið og er úr mjóum, ryðfríum rörum. Allar brýrnar eru samfelld burðarvirki, án þensluraufa.
- Göngubrúin yfir Hringbraut við Njarðargötu er lengst brúnna, alls 169 m. Lengsta haflengd er 27.5 m og hæð yfirbyggingar er 70 cm. Brúin liggur í láréttum spíral frá friðlandinu í Vatnsmýrinni og í boga yfir Hringbrautina þar sem hún tengist göngustígum Hljómskálagarðsins sem og systurbrú sinni yfir Njarðargötu.
- Þriðja brúin er sunnan við Landspítalann og er 86 m löng. Hún þverar Hringbrautina í skörpum, láréttum boga og endar brúin samsíða Hringbrautinni í suðri.
Brýrnar eru allar staðsteyptar og eftirspenntar sem reyndist hagkvæm lausn þar sem engin umferð var um vinnusvæðið á framkvæmdatíma.
Auk þess að gegna fagurfræðilegu hlutverki, eru bogaform brúnna vel til þess fallin að tengja saman aðliggjandi göngu- og hjólastíga. Hvítt sement, sem notað var í steypuna í brýrnar, undirstrikar ljósa og létta ásýnd mannvirkjanna.
Umhverfismál
Brúin yfir Hringbraut við Njarðargötu teygir sig inn að friðlandinu í Vatnsmýrinni sem setti legu brúarinnar skorður. Spíralform í suðurenda brúarinnar takmarkar rask við friðlandið en á sama tíma hækkar legu göngustígsins til að ná tilsettri hæð yfir Hringbrautina.
Uppspennt steinsteypa gerir hönnuðum kleift að minnka þversnið brúarinnar og þannig draga úr efnisnotkun og sýnileika og um leið minnka umhverfisfótspor mannvirkisins.
Verkþættir
Hlutverk EFLU
- For- og verkhönnun á tveimur nýjum göngubrúm yfir Hringbraut
- For- og verkhönnun á nýrri göngubrú yfir Njarðargötu
- Forhönnun á göngu- og hjólastígum
- Gerð kostnaðaráætlunar og útboðsgagna
- Þjónusta við verkið á framkvæmdatíma
Ávinningur verkefnis
Brýrnar hafa vakið athygli og unnið til verðlauna fyrir hönnun og frágang. Þær gegna mikilvægu hlutverki í göngu- og hjólastígakerfi borgarinnar auk þess sem þær stórauka öryggi gangandi og hjólandi vegfarenda um þessar umferðarþungu stofnæðar.
