Fréttir

Brú yfir Fossvog

11.3.2013

EFLA hefur verið ráðgjafi starfshóps Reykjavíkurborgar, Kópavogsbæjar og Vegagerðarinnar um brú yfir Fossvog og skilaði starfshópurinn greinargerð sinni í síðustu viku. Hlutverk hópsins var að skoða legu og útfærslu brúar yfir Fossvog sem skuli fyrst og fremst þjóna vistvænum ferðamátum, gangandi og hjólandi umferð og mögulega strætisvögnum.
  • Brú yfir Fossvog

Í greinargerðinni er farið yfir mögulega staðsetningu brúarinnar, kostnað, byggingartíma og áhrif hennar á siglingafélög í Fossvogi, umhverfið og fleira.

Kópavogsbær og Reykjavíkurborg hafa hvort í sínu lagi skilgreint umhverfisáætlun og hjólreiðaáætlun sem hafa það að markmiði að auka vistvænar samgöngur og stuðla að breyttum ferðavenjum íbúanna. Bygging hjóla- og göngubrúar yfir Fossvog samræmist þeim markmiðum vel. Talningar á umferð hjólandi og gangandi á vegum Reykjavíkur og Kópavogsbæjar við botn Fossvogs árið 2011 gefa til kynna að um 500-1000 manns séu á ferðinni þar á hverjum degi.

Brú yfir Fossvog bætir stofnstígakerfi höfuðborgarsvæðisins ásamt því að gefa skemmtilega möguleika á útivistarleiðum. Neikvæðu áhrif brúarinnar eru á starfsemi siglingafélaga í Fossvoginum þar sem hún setur þeim nokkrar skorður.

Skoðaðir voru mismunandi valkostir um lengd brúarinnar. Áætlað er að 270 m hjóla- og göngubrú með stuttum landfyllingum við hvorn enda kosti um 950 milljónir kr., 100 m brú með lengri landfyllingum er áætlað að kosti um 640 milljóni kr.

Sjá má hvernig brú yfir Fossvog getur litið út á meðfylgjandi myndum.

Verði breytingar á aðalskipulagi Kópavogsbæjar og Reykjavíkurborgar samþykktar af Skipulagsstofnun má gera ráð fyrir að tími frá samþykkt skipulagsáætlana að opnun brúar sé allt að 3 árum.

100m-bru-fra Vesturvor270m-bru-fra-Vesturvor