Fréttir

Fyrsta húsið byggt úr íslenskum viði

14.12.2016

Asparhúsið í Vallanesi á Fljótsdalshéraði var vígt föstudaginn 25. nóvember síðastliðinn að viðstöddum aðstandendum, iðnaðarmönnum, hönnuðum og öðrum velunnurum verksins. Asparhúsið er fyrsta húsið á Íslandi sem byggt er alfarið úr íslenskum viði. Þannig er allur burðarviður, klæðningar og innréttingar úr íslensku timbri, aðallega úr ösp frá Vallanesi auk, lerkis og grenis.
  • Opnun Asparhúss
    Asparhúsið hýsir verslun og kaffihús Móður Jarðar sem er vörumerki ábúenda á Vallanesi.

20161214 AsparhusMynd tekin af vefsíðu Móður Jarðar | Vallanes, www.vallanes.is

Ráðgjafarhlutverk varðandi undirbúning, hönnun og burðarviði

EFLA kom sem ráðgjafi að verkefninu strax á undirbúningsstigi þess í lok árs 2014. Fljótlega var farið að skoða möguleikann á að nota ösp í burðarviði hússins, en það er eitthvað sem hefur ekki verið gert áður. Í framhaldinu var hafist handa við að magntaka og ákveða stærðir sem uppfylltu skilyrði byggingarreglugerðar og viðeigandi byggingarstaðla. Þegar ljóst var að hægt væri að uppfylla þau skilyrði var ráðist í að fella aspir sem voru gróðursettar fyrir 30 árum í Vallanesi. Trjábolunum var flett hjá Skógrækt ríkisins á Hallormsstað og Skógarafurðum ehf á Ytri-Víðivöllum í Fljótsdal og efnið þurrkað. Burðarviðurinn fyrir Asparhúsið var að lokum tekinn út og vottaður og í kjölfarið hófst smíði hússins í byrjun árs 2016.

EFLA sá um hönnun á burðarvirki, frárennslislögnum og frágangi í samráði Albínu Thordarson, arkitekt hússins.

EFLA óskar aðstandendum Asparhúss á Vallanesi til hamingju með glæsilega byggingu og eftirtektarvert framtak.

Umfjöllun um Asparhúsið í Landandum

Umfjöllun um Asparhúsið á vef Skógræktarinnar

 Á myndinni sem er efst uppi í frétt eru frá vinstri talið, Albína Thordarson, arkitekt hússins, Eygló Björk Ólafsdóttir, Móðir Jörð, Eymundur Magnússon, Móðir Jörð og Elis B. Eiríksson, EFLA Austurlandi.