Fréttir

Hljóðvist: EFLA hlýtur styrk

23.10.2009

Kannanir sýna að víða er hljóðvist ábótavant í vistvænum byggingum.

Þar sem slíkar byggingar verða ?það sem koma skal? er mjög mikilvægt að sjá til þess að hljóðvist í þeim fari ekki aftur miðað við framþróun undanfarinna ára.

Góð hljóðvist í byggingum hefur mikil áhrif á heilsu og líðan notenda. Stjórn Íbúðalánasjóðs samþykkti á fundi 3. september sl. að veita 19 styrki til tækninýjunga og annarra umbóta í byggingariðnaði.

Þeirra á meðal er myndarlegur styrkur til hljóðvistarsviðs EFLU.

Verkefnið felst í að kanna hljóðvist í vistvænum byggingum, hvað felst í vistvænni hljóðvistarhönnun og finna um leið leiðir til að auka vægi hljóðvistar í vistvænum vottunarkerfum.

Markmiðið er að efla hljóðvistarþróun sem fylgir vistvænum byggingum og gera hljóðvist hátt undir höfði við vistvæna vottun.

Meðal annars á að fara yfir rannsóknarniðurstöður sem sýna með skýrum hætti áhrif góðrar hljóðvistar á heilsu og vellíðan í nokkrum gerðum bygginga.

Má þar nefna góð áhrif á talskilning, aukin afköst og færri mistök í starfi. Einnig verða lagðar fram skýrar tillögur um hvernig haga beri hljóðvist í vistvænum byggingum.

Verkefnisstjóri er Guðrún Jónsdóttir verkfræðingur hjá EFLU.

Verkefnið verður unnið í samstarfi við Reykjavíkurborg og styrkt af borginni, Framkvæmdasýslu ríkisins og Íbúðalánasjóði.

Styrkir Íbúðalánasjóðs voru afhentir þann 13. október.