Jökulmælingar
Í lok nóvember sl. fóru Páll Bjarnason frá Verkfræðistofu Suðurlands ásamt Sveini Svavarssyni og mældu stöðu Gígjökuls, í fylgd Ármanns Inga sem lagði til fjórhjól.
Gígjökull skríður til norðurs úr Eyjafjallajökli og hefur Jöklarannsóknafélagið o.fl. fylgst með framskriði og hopi hans áratugum saman.
Ferðin var einnig farin til að prófa Trimble VX alstöð við erfiðar aðstæður.
Ætlunin var að ferja alstöðina að jöklinum á fjórhjólinu eftir vatnsborði lónsins framan við jökultunguna.
Ekki gekk það eftir þar eð vatnsbakkinn var mjög torfær.
Ármann kallaði á félaga sína í Björgunarfélagi Árborgar sem komu umsvifalaust með bát og ferjuðu mælingamenn yfir lónið.
Mæling gekk vel, sporðurinn mældur með GPS tæki og hluti jökultungunnar skannaður með VX stöðinni.
Í ljós kom að jökullinn hopaði 53 m árin 2008 og 2009 og hefur hann hörfað hratt upp úr lóninu allt frá því á 10.áratug síðustu aldar.
Þar á undan lengdist hann í um það bil tvo áratugi en hopaði í nokkra áratugi, frá því upp úr 1920 fram yfir 1970.