Ráðstefna um stálbrýr
Alþjóðleg ráðstefna um stálbrýr fer fram í Prag, Tékklandi í næstu viku. Andri Gunnarsson, starfsmaður EFLU, flytur þar erindi um nýja hjóla- og göngubrú, Ullevålskrysset. Brúin er staðsett við Ullevål þjóðarleikvanginn í Osló og sá EFLA um hönnun hennar.
-
Módelmynd af nýju brúnni við Ullevål leikvanginn.
Að ráðstefnunni standa Czech Constructional Steelwork Association (CAOK) og European Convention for Constructional Steelwork (ECCS). Ráðstefnan er að jafnaði haldin á þriggja ára fresti og er skipulögð af staðbundinni og alþjóðlegri nefnd. Efnistökin í ár eru fjölbreytt og meðal þess sem verður fjallað um er endurgerð, smíði, bygging og viðhald á stálbrúm, göngubrýr, umferðarbrýr, járnbrautarbrýr og vöktun á stálbrúm.
Hönnunarfasi brúarinnar kynntur
Fyrirlestur Andra, Advanced layout of a steel bridge – Ullevaalskrysset footbridge, fjallar um hönnunarfasa 290 m langrar göngubrúar við Ullevålleikvanginn í Osló sem er í byggingu um þessar mundir. Þar mun Andri fjalla um allt frá frumdrögum, þar sem unnið var við val og útfærslu á legu og týpu af brú, fram að fullhönnuðu mannvirki sem er tilbúið til útboðs.
Andri Gunnarsson, byggingarverkfræðingur hjá EFLU.
Alþjóðlegur vettvangur
Ráðstefnunni er ætlað að vera faglegur vettvangur til að kynna nýjustu vörur, aðferðafræði og lausnir við hönnun, smíði, byggingu, rekstur og viðhald á stálbrúm. Ráðstefnan fer fram 10.-11. september og er hægt að skoða dagskrána á vefsíðu ráðstefnunnar.
Nánari upplýsingar um þjónustu EFLU á sviði brúarhönnunar.