Skrifað undir sáttmálann Nordic Built
Með undirskriftinni skuldbinda þeir sig til þess að fylgja tíu meginreglum í starfi sínu og fyrirtækja sinna og að gera nauðsynlegar ráðstafanir til þess að þróa samkeppnishæfar lausnir í sjálfbærri mannvirkjagerð.
Í samræmi við stefnu EFLU verkfræðistofu að vera leiðandi í umræðu um umhverfisvæna valkosti hefur EFLA skrifað fyrst verkfræðistofa á Íslandi undir sáttmála Nordic Built sem hvetur til þróunar á samkeppnishæfum lausnum í vistvænni mannvirkjagerð. Undanfarna mánuði hefur Helga Jóhanna Bjarnadóttir fyrir EFLU tekið þátt í undirbúningi sáttmálans ásamt 60 öðrum stjórnendum úr norræna byggingaiðnaðinum. Þann 13. september verður haldinn fundur í Reykjavík þar sem aðilum í byggingaiðnaðinum býðst að skrifa undir sáttmálann og vera þátttakandi í verkefninu.
Markmið Nordic Built verkefnisins er að byggingamarkaðurinn sameinist um að nýta sérþekkingu sína til þess að mæta aukinni eftirspurn eftir vistvænni mannvirkjagerð í heiminum, vera leiðandi í nýsköpun, grænum hagvexti og velferð. EFLA verkfræðistofa ásamt öðrum leiðandi fyrirtækjum í greininni hafa nú þegar tekið fyrstu skrefin og hvetja aðra til þess að gera hið sama.Nú þegar hefur EFLA verkfræðistofa unnið um nokkurt skeið eftir þeim þáttum sem koma fram í sáttmálanum. Í umhverfisstefnu EFLU kemur meðal annars fram að starfsmenn eru hvattir til vistvænnar hönnunar, stuðla að betri nýtingu aðlinda, minni sóun hráefna og aukinni endurnýtingu og endurvinnslu. Þetta endurspeglast meðal annars í neðangreindum verkefnum sem EFLA verkfræðistofa hefur fengist við að undanförnu:
- Vistvæn nálgun og góð innivist í hönnun Nýja Landsspítala Háskólasjúkrahúss
- Hjólreiðaráætlun fyrir Kópavogsbæ til að auka veg hjólreiða sem samgöngumáta í Kópavogi, þannig að hjólreiðar verði aðgengilegur, skilvirkur og öruggur ferðamáti.
- Þróun háspennulínu mastra þar sem tekið er tilliti til efnisnotkunar, ásýndarmála, takmörkunar jarðrasks, hljóðáhrifa og segulsviðsáhrifa.
- Bæta virkni rykhreinsibúnaðar í áliðnaði til að draga úr mengun.
- Rafvæðing loðnuverksmiðja sem dregur úr olíunotkun og CO2 losun sem minnkar mengun.
- Útreikningur á lífferilskostnaði (Life Cycle Costing) bygginga.
- Vistvænar ofanvatnslausnir/fráveitulausnir m.a. í Urriðaholtinu
- Vistferilsgreiningar (Life Cycle Assesment) og útreikningar á kolefnisspori fyrir vatnsafl Fljótsdalsstöðvar.
EFLA er stolt af því að vera þátttakandi að mótun sáttmálans og vera fyrst verkfræðistofa á Íslandi til að skrifa undir. Með þessu viljum við leggja línurnar til framtíðar.
Sjá nánar á heimasíðu Nordic Built.