Stærsta álver heims

14.5.2010

Í Abu Dhabi standa yfir framkvæmdir við byggingu Emal álversins, sem er í hlutaeigu Dubal álframleiðandans og emírsins í Abu Dhabi.  Framkvæmdir við álverið hófust í janúar 2008 en framleiðsla í fyrri áfanga þess í desember 2009.

Afkastageta fyrri áfanga álversins er 700.000 tonn af áli árlega, eða jafn mikil og öllum íslenskum álverum samanlagt. Ráðgert er að seinni áfangi álversins komist í gagnið árið 2014, en þá eykst afkastagetan í  1.400.000 tonn árlega. Þar með verður EMAL stærsta álver heims. Áætlaður framkvæmdakostnaður fyrri áfangans er alls 10,7 milljarðar bandaríkjadala.. Raforkuframleiðsla fyrir álverið fer fram í gasorkuveri sem afkastar 2.000 MW, eða um þreföldu afli  Kárahnjúkavirkjunar.

EFLA  býr að víðtæku tengslaneti samstarfsaðila um allan heim. Tveir þeirra sem EFLA hefur oft unnið  með,  Alstom og Alcan Alesa, fara með stór hlutverk í byggingu  álversins. EFLA hefur tekið að sér ýmis verkefni  fyrir þessa aðila. Má þar t.d. nefna hönnun stýrikerfa, forritun og  gangsetningu  hreinsivirkja, PotFeeding-kerfis  fyrir 756 ker, áfyllistöðva  og margvíslegra flutningskerfa fyrir súrál og koks. EFLA hefur að jafnaði 3 til 4 starfsmenn í starfstöð sinni í Sameinuðu Arabísku Furstadæmunum.