Stærstu manngerðu ísgöngin
Um er að ræða yfir 7000 m3 göng í hjarni og jökulís Langjökuls. Það gerir þau að stærstu manngerðu ísgöngum fyrir almenning í heiminum eftir því sem best er vitað. Göngin er grafinn út með stórum gröfum og hjólaskóflum en það fyrirkomulag kallar á mikla loftræstingu á verktíma.
EFLA sér um útfærslu verkefnisins í samvinnu við sýningarhönnuði, hannar lýsingu, loftræstingu, afvötnun og raflagnir ásamt því að halda utan um öll umhverfismál, öryggismál og skipulags- og leyfismál. Við allar útfærslur þarf að taka tillit til hreyfinga í ísnum en göngin hníga rólega saman með tímanum undan þeim þunga sem hvílir ofan á þeim. Dýpstu hlutarnar minnka það hratt að reglulega mun þurfa að víkka þau út. EFLA hefur umsjón með nákvæmum mælingum á hreyfingunum í ísnum í samvinnu við Háskóla Íslands. Til stendur að vinna rannsóknarverkefni um hnigið á komandi árum.
Aldrei áður hafa svo löng göng verið grafin í jökulís með þessum hætti í heiminum og mjög lítið er til skrifað um gröft í jökulís í fagtímaritum á sviði verkfræði. Því mun þetta verkefni auka þekkingu á þessu sviði sem vonandi mun hafa hagnýtt gildi í framtíðinni.