Fréttir

Umfangsmikið verkefni í Tyrklandi

16.10.2013

Undirritaður hefur verið samningur RARIK Orkuþróunar (RED) og EFLU verkfræðistofu við tyrkneska orkufyrirtækið Zorlu Enerji AS um virkjun jarðvarma við fjallið Nemrut í Austur-Tyrklandi.
  • Samningar við Zorlu Enerji AS

Zorlu er öflugt orkufyrirtæki með umfangsmikla starfsemi. Fyrirtækið á meðal annars og rekur stærstu jarðvarmavirkjun Tyrklands sem nýverið var stækkuð í 95 MWe.

Undanfarin ár hefur RARIK Turkison Enerji (RTE), félag í eigu EFLU og RED, unnið við rannsóknir á jarðhitasvæðum í Tyrklandi sem hafa staðfest að verulegar líkur eru á að unnt sé að nýta jarðvarma til orkuöflunar við Nemrut og byggja upp hitaveitu. Aðkoma Zorlu að málinu sem leiðandi aðila styrkir verkefnið og tryggir áframhaldandi rannsóknir og framkvæmdir á svæðinu.

Nýstofnað fyrirtæki, Nemrut Jeotermal Elektrik Üretimi AS (Nemrut Jeotermal), í eigu Zorlu og RTE mun annast frekari rannsóknir á svæðinu og síðan boranir vegna jarðvarmavirkjunar sem ætlað er að framleiða allt að 100-150 MWe af rafmagni og leggja til heitt vatn fyrir hitaveitu. Heimamenn hafa miklar væntingar til verkefnisins og ekki síst þekkingar Íslendinga á fjölbreyttri nýtingu á jarðhita. Nemrut Jeotermal stefnir að því að ráðast í virkjunarframkvæmdir og gerð hitaveitu á svæðinu.

Framkvæmdirnar í Tyrklandi fela meðal annars í sér útflutning á sérhæfðri þekkingu Íslendinga á sviði orkumála og nýtingu umhverfisvænna orkulinda. Fyrirtækin verða ráðgjafar við jarðhitaverkefnið og samninga því tengdu. Ráðgjafarsamningur EFLU og RED við Zorlu styrkir aðkomu íslenskrar þekkingar við nýtingu jarðvarmans í Tyrklandi sem er mikilvægur markaður á þessu sviði til framtíðar.

Efri myndin er tekin í höfuðstöðvum Zorlu eða í Zorlu Plaza í Istanbul í júní sl. þegar búið var að ganga frá viljayfirlýsingu MoU og samningar komnir á fulla ferð.
Á myndinni eru frá vinstri Sinan AK forstjóri Zorlu Enerji, J. Rúnar Magnússon (EFLU), Aygen Yayikoglu frá Crescent Capital sem er samstarfsaðili okkar í Istanbul, Müjgan Ersa Önsoy lögfræðingur Zorlu Enerji og Steinar Friðgeirsson, framkvæmdastjóri RED

nemrut frettSteinar Friðgeirsson ásamt Veysel Yurdakul ríkisstjóra Bitlis héraðs og Bahadir Erdogan þegar sótt var um vinnsluleyfi á Nemrut svæðinu í apríl 2013.