Fréttir


Fréttir

Úthlutun úr Samfélagssjóði 2023

1.12.2023

Í gær, fimmtudaginn 30. nóvember, voru styrkir úr Samfélagssjóði EFLU afhentir. Í ár voru veittir sex styrkir úr sjóðnum. Verkefnin voru af fjölbreyttum toga og flokkuðust til góðgerðar- og félagsmála, menntamála, íþrótta- og æskulýðsmála og menningu og lista. 

  • group photo
    Styrkþegar Samfélagssjóðs EFLU 2023 ásamt Ágústu Rún Valdimarsdóttur og Sæmundi Sæmundssyni

Markmið sjóðsins er að styðja við framtak einstaklinga og hópa sem stuðla að farsælli þróun samfélagsins, auknum lífsgæðum og fjölbreyttu mannlífi.

Alls bárust sjóðnum 74 umsóknir en eins og áður sagði hlutu sex verkefni styrk að þessu sinni. Í úthlutunarnefnd Samfélagssjóðs EFLU sitja Sæmundur Sæmundsson forstjóri, Anna Heiður Eydísardóttir og Ágústa Rún Valdimarsdóttir.


Verkefnin sem hlutu styrk úr Samfélagssjóði EFLU 2023:

Kraftur stuðningsfélag 
Kraftur er stuðningsfélag fyrir ungt fólk sem greinst hefur með krabbamein og aðstandendur þeirra. Kraftur hlaut 500.000 kr. styrk fyrir fjölskylduviðburði á vegum félagsins. Viðburðirnir eru boðnir félagsmönnum Krafts að kostnaðarlausu og eru hugsaðir til að skapa vettvang þar sem fjölskyldur geta komið saman og átt góðar stundir þrátt fyrir þær hindranir sem þau eru að takast á við.

KrafturÞórunn Hilda Guðjónsdóttir hjá Krafti stuðningsfélagi ásamt Sæmundi Sæmundssyni forsjóra EFLU


Vox Feminae
Kvennakórinn Vox Feminae hlaut 450.000 kr. styrk til örtónleikahalds á hjúkrunarheimilum á höfuðborgarsvæðinu. Í lok hverra tónleika verður efnt til samsöngs heimilsfólks, starfsfólks og kórkvenna. Kórinn fagnar þrjátíu ára starfsafmæli í ár og er örtónleikaröð á hjúkrunarheimilum ein leið til að fagna þeim tímamótum.

Vox_feminaeStefan Sand kórstjóri Vox Feminae og Sigurbjörg Aðalsteinsdóttir kórmeðlimur taka við styrknum frá Sæmundi Sæmundssyni forstjóra EFLU. 


STEM Húsavík
STEM Húsavík hlaut 400.000 kr. styrk fyrir Forritunarklúbb STEM fyrir börn á aldrinum 8-14 ára og þátttöku klúbbsins í FIRST Lego League forritunarkeppninni. STEM Húsavík var sett á fót í maí 2022 og er fyrsta STEM (Science, Technology, Engineering, Math) námsvistakerfið á Íslandi þar sem sérstökl áhersla er lögð á samfélagsþátttöku.

STEMHuld Hafliðadóttir forstöðukona og stofnandi STEM á Húsavík, Sæmundur Sæmundsson forstjóri EFLU og Bridget Burger Fulbright sérfræðingur og ráðgjafi við STEM Húsavík


Körfuknattleiksdeild Skallagríms
Körfuknattleiksdeild Skallagríms hlaut 350.000 kr styrk fyrir kaupum á skotvél sem hefur þann tilgang að grípa fráköst og senda boltann til baka á leikmenn. Vélin er notuð í þjálfun á öllum aldursstigum og skapar stórbætta aðstöðu fyrir einstaklinga sem vilja bæta körfuknattleik sinn.

SkallagrimurSigríður G. Bjarnadóttir, formaður körfuknattleiksdeildar Skallagríms ásamt Sæmundi Sæmundssyni forstjóra EFLU. 


Fjölskylduhjálp Íslands 
Fjölskylduhjálp Íslands, sem fagnar 20 ára starfsafmæli á árinu, hlaut 200.000 kr styrk fyrir matarsöfnun fyrir fjölskyldur í landinu.

FjolskylduhjalpSæmundur Sæmundsson forstjóri veitir Ásgerði Jónu Flosadóttur og Jóhannesi Jóni Gunnarssyni styrk fyrir matarsöfnun Fjölskylduhjálpar Íslands.


Félagsfærnifjör
Íunn Eir Gunnarsdóttir hlaut 100.000 kr styrk fyrir útgáfu á kennsluhandbókinni Félagsfærnifjör. Tilgangur kennsluhandbókarinnar er að veita fagfólki verkfæri til að kenna börnum félagsfærni og byggir á kenningum um nám, hópastarf, hlutverk, leiðbeinenda og áhrif jafningja. Íunn Eir tók við styrknum á starfsstöð okkar á Akureyri af Hjalta Má Bjarnasyni svæðisstjóra okkar á EFLU Norðurlandi.

Hjalti_iunnÍunn Eir Gunnarsdóttir ásamt Hjalta Má Bjarnasyni, svæðistjóra EFLU á Norðurlandi



Við óskum styrkþegum innilega til hamingju og þökkum öllum sem sóttu um í Samfélagssjóð EFLU fyrir umsóknirnar.

Opnað hefur verið fyrir umsóknir í Samfélagssjóð EFLU fyrir 2024.

Samfélagssjóður EFLU