Fréttir

Vaxandi umsvif EFLU í olíuiðnaði

26.11.2012

Ráðgjafarþjónusta EFLU verkfræðistofu hefur undanfarið vaxið hratt í olíuiðnaðinum í Noregi. Tekjur EFLU tengdar olíuiðnaðinum í Noregi er nú orðnar um 200 milljónir króna á ársgrundvelli, eða um 17% af væntum heildartekjum EFLU í Noregsverkefnum í ár. EFLA hefur unnið að verkefnum vegna 6 olíuborpalla vítt og breitt við strendur Noregs.
  • Hermir olíuborpallsins í Brage
    Skjámynd hermis, sem líkir eftir borbúnaði olíuborpallsins Brage
Sérfræðingar EFLU vinna í Reykjavík, Stavanger og á borpöllunum sjálfum að verkefnum í samvinnu við norska fyrirtækið Advanced Control. Viðskiptavinir eru fjölmargir aðilar í Noregi, þar á meðal Aker Solutions, sem er stór þjónustuaðili við olíuiðnaðinn með um 20 þúsund starfsmenn.

Til þessa hefur EFLA komið aðallega að fjórum ólíkum viðfangsefnum á olíuborpöllum í Noregi.
EFLA hefur tekið að sér forritun og gangsetningu á stjórnkerfi sem meðhöndlar og fylgist með ástandi ?leðjunnar" sem dælt er niður með bornum og skiljukerfi sem tekur við efninu þegar það kemur upp aftur. Stöðugt er fylgst með ástandi efnisins bæði af kerfinu og jarðfræðingum borpallsins. Leðjan gegnir veigamiklu hlutverki við borunina. Hlutverk hennar er m.a. að kæla borkrónu borsins, flytja burt borsvarf, gefa upplýsingar um efnasamsetningu jarðlaganna sem borað er í gegnum og halda þrýstingi á holunni til að hún falli ekki saman.

Annað verkefni sem EFLA hefur tekið að sér er forritun og gangsetning á neyðarstöðvunarkerfi borpalls. Kerfið les meðal annars stöður allra bruna og gas skynjara borpallsins og sér um að grípa sjálft inn í ef hættuástand skapast til að tryggja öryggi á pallinum. Inngripin geta t.d. falist í að einangra einstök svæði eða að slökkva á öllu rafmagni í borpallinum.

Þriðja viðfangsefnið er forritun á hermi sem líkir eftir borbúnaði olíuborpallsins Brage. Fulltrúar Statoil í Noregi, sem eiga og reka Brage borpallinn, hafa líst yfir ánægju með það verkefni sem EFLA og Aker unnu saman. Nýverið fór hermirinn í gegnum úttektir og próf hjá notandanum og stóðst verkið allar prófanir án athugasemda.

Einnig hefur EFLA komið að minni þjónustuverkum við ýmis stjórnkerfi á olíuborpöllum.

adalmynd Borpallurinn Brage, ljósmyndari: Øyvind Hagen - Statoil