Fréttir

Verkfræðistofa Austurlands sameinast EFLU

8.7.2014

Um síðustu mánaðamót sameinaðist Verkfræðistofa Austurlands EFLU verkfræðistofu. Fyrirtækin tvö hafa verið í umtalsverðu samstarfi undanfarin ár, sem hefur skilað góðum árangri og verið báðum aðilum til hagsbóta.
  • EFLA logo

Með þessum breytingum er verið að renna styrkari stoðum undir þá starfsemi og þjónustu sem fyrirtækin hafa stundað á Austurlandi og gefa starfsmönnum kost á að takast á við stór og spennandi verkefni um allt land og erlendis. Einnig er verið að tryggja fjölbreytt bakland í þekkingu og þjónustu.

Einar Andrésson er svæðisstjóri EFLU á Austurlandi en starfsstöðvar á svæðinu eru nú þrjár, staðsettar á Reyðarfirði, Egilsstöðum og Seyðisfirði. Þjónustan sem verið hefur hjá Verkfræðistofu Austurlands verður áfram óbreytt og engar breytingar verða í hópi starfsfólks við sameininguna. Dagleg stjórn skrifstofunnar á Egilsstöðum verður áfram í höndum þeirra sem þar hafa starfað um langt árabil. Áfram verður lögð höfuðáherslu á öfluga starfsemi og þjónustu á Austurlandi.

Fastráðnir starfsmenn EFLU samstæðunnar eru nú um 250 talsins og hefur þeim fjölgað um rúmlega 30 % undanfarin þrjú ár. Á Austurlandi starfa í dag 18 manns í fullu starfi og aukalega eru 4 sumarstarfsmenn og efnilegir framtíðarstarfsmenn. EFLA leggur mikla áherslu á að styrkja starfsemina bæði innanlands og erlendis, starfar í öllum landshlutum á Íslandi, er einnig þátttakandi í fyrirtækjum í sjö öðrum löndum og með verkefni víða um heim.