Efnistaka í Stapafelli, Súlum og Rauðamel
Stapafell, Rauðamelsnáma, Súlur, Mat á umhverfisáhrifum á Reykjanesi
Mat á umhverfisáhrifum áframhaldandi efnistöku á Reykjanesi
Sett hafa verið fram drög að tillögu að matsáætlun vegna mats á umhverfisáhrifum áframhaldandi efnistöku í Stapafelli, Súlum og Rauðamel á Reykjanesi. Efnistökusvæðin eru á mörkum tveggja sveitarfélaga, Reykjanesbæjar og Grindavíkur.
Fyrirhuguð efnistaka er innan beggja sveitarfélaganna en aðkoma er um Reykjanesbæ. Gert er ráð fyrir efnistöku á svæðinu á aðalskipulagi Grindavíkur 2010-2030 og Reykjanesbæjar 2015-2030.
EFLU hefur verið falið að vinna umhverfismatið.
Um verkefnið
Efnistaka hefur átt sér stað í Stapafelli og nágrenni síðan í kringum árið 1950 þegar uppbygging byrjaði á varnarliðssvæðinu og í Rauðamelsnámu frá árinu 1972. Vegna breytts lagaumhverfis og til að festa námuna í sessi sem framtíðarefnistökustað er nú nauðsynlegt að fjalla um námuvinnsluna í samræmi við lög um mat á umhverfisáhrifum nr. 106/2000.
Efnistaka af þessari stærð fellur undir framkvæmd af flokki A samkvæmt lögum um mat á umhverfisáhrifum og er því ávallt matskyld, sjá lið 2.01 í viðauka laganna: „Efnistaka og/eða haugsetning á landi eða úr hafsbotni þar sem áætlað er að raska 50.000 m² svæði eða stærra eða efnismagn er 150.000 m³ eða meira“.
Efnistökusvæðið sem Íslenskir aðalverktakar hafa vinnslurétt á, og er hér í mati á umhverfisáhrifum, er staðsett í sveitarfélögunum Grindavíkurbæ og Reykjanesbæ en aðkoma er eingöngu um Reykjanesbæ. Um er að ræða tvö aðskilin efnistökusvæði, annarsvegar Súlur og Stapafell og hinsvegar Rauðamel, úr tveim mjög ólíkum jarðmyndunum og því þurfa bæði efnistökusvæðin að fara í umhverfismat.
Í Stapafelli er unnið bögglaberg, en það hentar mjög vel sem burðarhæft fyllingarefni undir vegi, götur og byggingar. Efnið er notað óunnið eða harpað í mismunandi kornastærðir. Mikil þörf er fyrir bögglaberg um fyrirsjáanlega framtíð og því mikilvægt að tryggja góðan aðgang að bögglabergsnámum. Í Súlum er unninn sandur í steypuframleiðslu, hálkuvarnir fyrir flugbrautir og sandur til að sanda með rörum og strengjum. Í Rauðamelsnámu er unnin perlumöl til steypuefnaframleiðslu.
Athugasemdafrestur
Drög að tillögu að matsáætlun fyrir bæði efnistökusvæðin hafa nú verið lögð fram til kynningar á vef EFLU. Allir geta kynnt sér drögin og lagt fram athugasemdir.
- Athugasemdir vegna efnistökusvæðisins í Súlum og Stapafelli skal merkja „Efnistaka í Stapafelli og Súlum á Reykjanesi“ og senda á netfangið snaevarr.georgsson@efla.is
- Athugasemdir vegna efnistökusvæðisins í Rauðamel skal merkja „Efnistaka í Rauðamel á Reykjanesi“ og senda með tölvupósti á netfangið: snaevarr.georgsson@efla.is
- Athugasemdir í bréfpósti skal senda á:
EFLA verkfræðistofa
B.t. Snævarrs Arnar Georgssonar
Höfðabakki 9
110 Reykjavík
Athugasemdafrestur var til og með 7. mars 2018.
Skjöl
Drög að matsáætlun - Stapafell og SúlurDrög að matsáætlun - Rauðimelur