Hólsvirkjun í Fnjóskadal, vatnsaflsvirkjun 5,5 MW
Arctic Hydro hefur lagt fram frummatsskýrslu fyrir Hólsvirkjun í Fnjóskadal til athugunar hjá Skipulagsstofnun.
Um verkefnið
Arctic Hydro áformar að reisa 5,5 MW vatnsaflsvirkjun sem gengur undir nafninu Hólsvirkjun.
Framkvæmdasvæðið er nyrst í Fnjóskadal í landi Ytra-Hóls, Syðra-Hóls og Garðs. Hólsá og Gönguskarðsá, sem saman mynda Árbugsá, verða virkjaðar sunnan Garðsfells. Hólsá og Gönguskarðsá verða stíflaðar í um 310 m.y.s. og vatni veitt um aðrennslispípu að stöðvarhúsi á bakka Fnjóskár í 60 m.y.s. Aðrennslispípa verður grafin niður að jöfnunarþró á hálsi sunnan Garðsfells. Jöfnunarþró verður niðurgrafin að mestu. Þaðan verður niðurgrafin þrýstipípa að stöðvarhúsi. Vegslóði verður lagður frá Ytra-Hóli að þrýstipípu og meðfram pípu að inntaksstíflum.
Undirbúningur framkvæmdarinnar hefur staðið yfir um alllangt skeið. Samkvæmt ákvörðun Skipulagsstofnunar um matsskyldu er framkvæmdin háð mati á umhverfisáhrifum skv. lögum nr. 106/2000 um mat á umhverfisáhrifum. Tillaga að matsáætlun var kynnt vorið 2017 og samþykkt síðar sama ár af Skipulagsstofnun.
Kynning á frummatsskýrslu
Frummatsskýrsla liggur frammi til kynningar frá 5. janúar 2018 til 16. febrúar 2018 á eftirtöldum stöðum: Á skrifstofu Þingeyjarsveitar, í Þjóðarbókhlöðunni og hjá Skipulagsstofnun. Frummatsskýrslan er jafnframt aðgengileg á vefsíðum Skipulagsstofnunar og EFLU.
Athugasemdafrestur
Allir hafa rétt til að kynna sér framkvæmdina og leggja fram athugasemdir. Athugasemdir skulu vera skriflegar og berast eigi síðar en 16. febrúar 2018 til Skipulagsstofnunar bréfleiðis eða með tölvupósti á skipulag@skipulag.is
Skrár
FrummatsskýrslaTillaga að matáætlun