Landmótun og stækkun Jaðarsvallar
Jaðarsvellir, Stækkun á jaðarsvelli, Golfklúbbur Akureyrar
Mat á umhverfisáhrifum haugsetningar, landmótunar og stækkunar á Jaðarsvelli.
Nú er lögð fram til kynningar frummatsskýrsla vegna mats á umhverfisáhrifum haugsetningar, landmótunar og stækkunar á Jaðarsvelli á Akureyri. Framkvæmdaraðili er Akureyrarbær en rekstraraðili Jaðarsvallar er Golfklúbbur Akureyrar. Í gildi er deiliskipulag fyrir Jaðarsvöll frá árinu 2011 sem gerir ráð fyrir stækkun vallarins.
Um verkefnið
Starfræktur hefur verið golfvöllur að Jaðri á Akureyri í hartnær hálfa öld en allt frá árinu 2007 hafa verið áform um stækkun vallarins samkvæmt samningi milli Akureyrarbæjar og Golfklúbbs Akureyrar.
Til stendur að flytja um 500.000 m3 af ómenguðum jarðvegi sem fellur til vegna jarðvegsskipta við uppbyggingu í bænum inn á land golfvallarins. Þar verður gengið frá jarðveginum jafnóðum og hann mótaður að hönnun stækkunar golfvallarins. Framkvæmdartími er um 20-30 ár, allt eftir hraða framkvæmda í bænum og því hver eftirspurn eftir stækkun golfvallarins verður. Á svæðinu er þegar leyfi fyrir moldarlosun á 49.000 m3 og hefur hluti þeirrar heimildar nú þegar verið nýttur. Frágangur svæðisins verður í samræmi við frágangsáætlun og hönnun golfvallar.
Vegna umfangs haugsetningar fellur framkvæmdin undir flokk A skv. lið 2.01 í 1. viðauka laga um mat á umhverfisáhrifum nr. 106/2000 og er því ávallt matsskyld: „Efnistaka og/eða haugsetning á landi eða úr hafsbotni þar sem áætlað er að raska 50.000 m² svæði eða stærra eða efnismagn er 150.000 m³ eða meira“.
Í ferlinu í er lagt mat á eftirtalda þætti: Gróður og vistlendi, fuglalíf, landslag og ásýnd lands, samfélag, loftgæði, hljóðvist og menningarminjar.
Frummatsskýrsla
Kynningartími frummatsskýrslu stendur yfir í 6 vikur, frá 3. maí 2019 til 14. júní 2019. Skýrslan liggur frammi til kynningar í ráðhúsinu á Akureyri, í Þjóðarbókhlöðunni og hjá Skipulagsstofnun.
Frummatsskýrslan er aðgengileg á vefsíðum Skipulagsstofnunar og EFLU (sjá neðar í greininni).
Athugasemdafrestur
Athugasemdafrestur er til og með 14. júní 2019. Athugasemdir við frummatsskýrslu skulu vera skriflegar og berast til Skipulagsstofnunar, Borgartúni 7b, 105 Reykjavík eða með tölvupósti.
Á vef Skipulagsstofnunar fást ennfremur nánari upplýsingar um mat á umhverfisáhrifum.
Skjöl
Tillaga að matsáætlunDrög að tillögu að matsáætlun