Stækkun kjúklingabús að Hurðarbaki, Hvalfjarðarsveit
Matfugl ehf. áformar að stækka kjúklingabú sitt að Hurðarbaki í Hvalfjarðarsveit úr 84 þúsund stæðum í allt að 192.000 stæði með byggingu fjögurra nýrra kjúklingahúsa austan við núverandi eldishús.
Um verkefnið
Framkvæmdin er matsskyld skv. tölulið 1.09 i. (Þauleldi alifugla og svína með að minnsta kosti 85.000 stæði fyrir kjúklinga eða 60.000 fyrir hænur) í 1. viðauka laga nr. 106/2000 um mat á umhverfisáhrifum. Framkvæmdin fellur undir flokk A, þ.e. framkvæmdir sem ávallt eru háðar mat á umhverfisáhrifum.
Í frummatsskýrslu verður lögð megináhersla á þá umhverfisþætti sem fjallað hefur verið um við sambærilegar framkvæmdir framkvæmdaraðila, þ.e. í mati á umhverfisáhrifum fyrir stækkun kjúklingabús Matfugls á Melavöllum á Kjalarnesi frá árinu 2009.
Stækkun kjúklingabús að Hurðarbaki Hvalfjarðarsveit. Tillaga að matsáætlun tekin til meðferðar hjá Skipulagsstofunun
Skipulagsstofnun hefur tekið til meðferðar tillögu Matfugls ehf. að matsáætlun vegna mats á umhverfisáhrifum vegna stækkunar Kjúklingabús að Hurðarbaki, Hvalfjarðarsveit og er hún nú aðgengileg almenningi og hagsmunaaðilum.
Tillagan liggur frammi til kynningar hjá Skipulagsstofnun og á heimasíðu EFLU verkfræðistofu. Allir geta kynnt sér tillöguna og lagt fram athugasemdir.
Athugasemdir skulu vera skriflegar og berast til Skipulagsstofnunar, Laugavegi 166, 105 Reykjavík eigi síðar en 5. desember 2016. Þar fást ennfremur nánari upplýsingar um mat á umhverfisáhrifum.
Skipulagsstofnun hefur leitað umsagnar Hvalfjarðarsveitar, Heilbrigðiseftirlits Vesturlands, Matvælastofnunar (MAST), Minjastofnunar Íslands, Náttúrufræðistofnunar Íslands og Umhverfisstofnunar.