Stekkjarvík - aukning á urðun
Norðurá bs. undirbýr nú mat á umhverfisáhrifum vegna aukningar á árlegu magni til urðunar á urðunarstaðnum í Stekkjarvík í landi Sölvabakka, Blönduósi úr að hámarki 21.000 tonnum á ári hverju í 30.000 tonn, eða um samtals 9.000 tonn á ári. Ekki er um að ræða aukningu á heildarmagni úrgangs sem urðaður verður í Stekkjarvík.
Um tilgang matsáætlunar
Matsáætlun er verkefnisáætlun fyrir mat á umhverfisáhrifum. Í henni er fyrirhugaðri framkvæmd, valkostum og framkvæmdarsvæði lýst og fjallað um umfang og áherslur mats á umhverfisáhrifum. Jafnframt er tilgreint hvaða gögn eru fyrir hendi sem nýtt verða við matsvinnuna og hvaða viðbótargagna þurfi að afla vegna verkefnisins.
Í frummatsskýrslu verður lagt mat á áhrif framkvæmdar á eftirfarandi þætti: Landslag og sjónræn áhrif; loft og hætta - gasmyndun; loft – lyktarmál; vatn og jarðvegur, þ.m.t. sigvatn; hljóðvist; hreinlæti – fok úrgangs og annarra efna; hreinlæti og hætta – fuglar og meindýr; samfélag og umferð.
Kynning á tillögu að matsáætlun og athugasemdafrestur
Tillaga að matsáætlun aukningar urðunarinnar er birt á vefsíðum Skipulagsstofnunar og EFLU. Allir geta gert athugasemdir eða komið með ábendingar við tillögu að matsáætlun, og sendir Skipulagsstofnun auk þess tillöguna til ákveðinna umsagnaraðila.
Athugasemdir skulu vera skriflegar og berast eigi síðar en 17. apríl 2019 til Skipulagsstofnunar bréfleiðis eða með tölvupósti á skipulag@skipulag.is
Að loknum kynningartíma verður hafist handa við gerð frummatsskýrslu, að teknu tilliti til ákvörðunar Skipulagsstofnunar skv. lögum um mat á umhverfisáhrifum.