Tenging Hólmsár - og Búlandsvirkjana
Landsnet hf. hefur lagt fram tillögu að matsáætlun vegna tengingar Hólmsár- og Búlandsvirkjana með háspennulínum, Skaftárhreppi. Tillaga að matsáætlun liggur frammi til kynningar frá 23. nóvember til 9. desember 2011 hjá Skipulagsstofnun og á netinu á www.skipulagsstofnun.is, www.efla.is og www.landsnet.is.
Um verkefnið
Í Skaftártungu er til athugunar uppbygging tveggja vatnsaflsvirkjana; Hólmsárvirkjunar og Búlandsvirkjunar. Verði af annarri hvorri framkvæmdinni eða báðum ber Landsneti hf að tryggja tengingu þeirra við raforkukerfið. Framkvæmdin felur í sér nýbyggingu háspennulína frá fyrirhuguðum stöðvarhúsum Hólmsár- og Búlandsvirkjana. Lagðar verða annaðhvort 132 kV eða 220 kV línur, háð tilhögun virkjana. Einnig er lagður fram sá valkostur að leggja tvær samhliða línur frá Búlandsvirkjun norður að tengipunkti við Fremri-Tólfahringa.
Háspennulínurnar eru matsskyldar skv. 22. tl. í 1. viðauka laga nr. 106/2000 m.s.br. um mat á umhverfisáhrifum, þar sem taldar eru upp framkvæmdir sem ávallt eru háðar mati á umhverfisáhrifum.
Í matsáætlun er fyrirhugaðri framkvæmd, valkostum og framkvæmdasvæði lýst og fjallað um umfang og áherslur mats á umhverfisáhrifum. Jafnframt er tilgreint hvaða gögn eru fyrir hendi sem nýtt verða við matsvinnuna og hvaða gagnaöflun er yfirstandandi eða fyrirhuguð.
Í frummatsskýrslu verða áhrif framkvæmdar á eftirfarandi þætti metin: Gróður, fuglalíf, jarðfræði og jarðmyndanir, landslag og sjónræna þætti, útivist og ferðamennsku, fornleifar, neysluvatn og vatnsvernd, og náttúruvá.
Allir hafa rétt til að kynna sér tillöguna og leggja fram athugasemdir. Athugasemdir skulu vera skriflegar og berast eigi síðar en 9. desember 2011 til Skipulagsstofnunar, Laugavegi 166, 150 Reykjavík.