Ég brenn fyrir því að taka virkan þátt í að byggja upp samfélagið í samvinnu við verkkaupa og vinnufélaga. Teymisfyrirkomulagið á vinnustaðnum þar sem hvatt er til skoðanaskipta styður vel við að ná bestu mögulegu útkomu í verkefnavinnunni.
Reynir hefur á tæpum 20 ára starfsferli hjá EFLU fengist við margt og á að baki fjölþætta starfsþróun innan fyrirtækisins. „Í upphafi kom ég inn í umhverfismálin nánast fyrir tilviljun en fann síðan hjá mér þörf fyrir að prófa fleira. Úr varð að mér bauðst að vinna við verkeftirlit sem var mjög lærdómsríkur tími en ráðgjöfin kallaði sterkt til mín og varð ég hluti af teymi sem vann við að koma Búðarhálsvirkjun í framkvæmd. Að því loknu fór ég í nýsköpunarverkefni og svo aftur í umhverfismálin þar sem ég byrjaði og er þar ennþá og er núna fyrirliði þess teymis.“
Það sem kom honum mest á óvart þegar hann hóf störf hjá EFLU var það hugarfar að allir eru jafnir og hluti af sterkri heild „Mér er það mjög minnisstætt að þegar ég var nýbyrjaður og kominn
á fullt í eitthvað spennandi verkefni sem mér var fyllilega treyst fyrir lenti
ég á spjalli við mér mun eldri samstarfsmann. Ég ræddi þó nokkuð lengi við hann
um málið og hann var mjög áhugasamur. Síðar komst ég að því að þetta var
aðaleigandi stofunnar á þeim tíma og stýrði öllu en það var engin leið að
skynja það á honum. Þessi andi hefur ætíð verið til staðar hjá EFLU og nú þegar
ég hef sjálfur tekið að mér stjórnunarhlutverk hjá fyrirtækinu reyni ég að hafa þetta
alveg eins.“
Honum finnst einkenna EFLU að hvatt er til skoðanaskipta, öllum leyft að hafa sína skoðun og hafa þannig áhrif á gang mála. „Við hjálpumst mikið að sem leiðir alltaf til betri niðurstöðu. Ég tel að teymisfyrirkomulagið sem við höfum tekið upp styðji mjög við þetta, við leysum málin saman og stýrum hlutunum saman.“
„Ég mæli hiklaust með EFLU sem vinnustað, hér hefur mér alltaf liðið vel og fundið fyrir skilning og sveigjanleika þegar á slíkt hefur reynt.“
Reynir Sævarsson, byggingarverkfræðingur á samfélagssviði.