EFLA á SamorkuþingiEFLA á Samorkuþingi

Framtíð orkumála – drifin áfram af sérfræðiþekkingu EFLU

Sérfræðingar EFLU búa yfir víðtækri reynslu og djúpstæðri innsýn í orkumál – allt frá stefnumótun og orkuskiptum til hönnunar og þróunar raforkuinnviða um land allt. Við vinnum náið með viðskiptavinum okkar að framúrskarandi lausnum sem standast áskoranir dagsins í dag og móta sjálfbæra framtíð.

Með fjölbreyttri þekkingu og öflugri teymisvinnu nýtum við kraft nýsköpunar og verkfræði til að leiða orkuskipti og styðja við trausta og hagkvæma uppbyggingu orkuinnviða. Í sameiningu mótum við framtíðarsýn í orkumálum.

Sjáumst á Samorkuþingi!

Raforku- og hitaveituöryggi: Áfallaþolnir orkuinnviðir

Fimmtudaginn 22. maí kl. 15:27 | Hamrar | Hjörtur Jóhannsson

Í erindinu verður fjallað um hvernig hægt sé að efla áfallaþol orkuinnviða gagnvart náttúruvá, einkum á svæðum þar sem langvarandi tímabil eldsumbrota er um garð gengið.

Kynntar verða nýjar nálganir við þróun og uppbyggingu raforkuflutningskerfis, þar sem markmiðið er að tryggja að einstakur atburður geti ekki ógnað afhendingaröryggi á Suðurnesjum. Greint verður frá starfi átakshóps Almannavarna um orkuöryggi á Reykjanesi, en þar hefur EFLA tekið virkan þátt ásamt Landsneti, HS Veitum, HS Orku og Verkís. Meðal annars verður fjallað um hvernig nýta megi hraunflæðihermanir til að meta afhendingaröryggi raforkukerfisins og til að greina mögulegar úrbætur með tilliti til áfallaþols.

Að lokum verður hugmyndum varpað fram varðandi uppbyggingu áfallaþolinnar hitaveitu, meðal annars með samtengingu veitukerfa, nýtingu nýrra vinnslusvæða og innleiðingu neyðaráætlana sem unnt er að hrinda fljótt í framkvæmd.

Möguleikar rafeldsneytis á Íslandi

Fimmtudaginn 22. maí kl. 15:35 | Hamraborg | Ágústa Steinunn Loftsdóttir

Hvernig getur Ísland nýtt rafeldsneyti í þágu loftslagsmála, efnahags og þjóðaröryggis? Fjallað verður um möguleika Íslands til framleiðslu og notkunar rafeldsneytis, eldsneytis sem framleitt er með raforku og kolefni, meðal annars úr lífmassa eða úrgangi. Greint verður frá stærðargráðum, tæknilegum áskorunum og hráefnaþörf, ekki síst í ljósi skorts á umframorku í núverandi raforkukerfi. Jafnframt verður fjallað um tækifæri rafeldsneytis í orkuskiptum flugsamgangna og hvernig slík þróun gæti stuðlað að nýrri atvinnuuppbyggingu, útflutningstekjum og auknu orkuöryggi þjóðarinnar. Málstofan byggir meðal annars á niðurstöðum vinnu starfshóps um orkuskipti í flugi og greiningum EFLU fyrir Umhverfis-, orku- og loftslagsráðuneytið.

Virkjun glatvarma í verksmiðju TDK

Föstudaginn 23. maí kl. 09:30 | Hamrar | Árni Sveinn Sigurðsson

Sameiginlegt erindi Norðurorku, Stefán H. Steindórsson, og EFLU, Árni S. Sigurðsson.

Framleiðsluvélar aflþynnuverksmiðju TDK eru kældar með sjó. Undanfarin tvö ár hafa TDK og Norðurorka unnið að nýtingu glatvarmans með því að leiða bakrásarvatn úr kerfi NO að Krossanesi, hita í varmaskiptum í kælikerfi TDK og dæla upphituðu bakrásarvatninu inn á stofnæð NO frá Hjalteyri. Kerfið var tekið í notkun í desember sl. og skilar um 10 MW varmaafli, sjókæling TDK minnkar að sama skapi.

EFLA kom að hönnun kerfis og lagna og eftirliti með framkvæmd, í samvinnu við NO og TDK.

Vindorka - hvernig hún leggst á kerfið

Föstudaginn 23. maí kl. 11:35 | Bíósalur | Hjörtur Jóhannsson

Fjallað verður um vindorku og þær áskoranir sem hún skapar fyrir íslenska raforkukerfið. Með breytilegri framleiðslu sem ræðst af veðri skapast krefjandi aðstæður fyrir kerfisrekstur, sérstaklega í litlu og einangruðu kerfi líkt og því íslenska. Rætt verður hvernig breyttir kerfiseiginleikar, líkt og minni tregða og takmarkað skammhlaupsafl, hafa áhrif á stöðugleika og tíðnireglun.

Kynntar verða niðurstöður fyrsta fasa rannsóknar- og þróunarverkefnisins Flutningskerfi framtíðar, þar sem Landsnet hefur þróað nýtt greiningartól til að meta áhrif vindorku á flutningskerfið og hvernig megi tryggja rekstraröryggi með mismunandi útfærslum á kerfisuppbyggingu og útjöfnun. Fjallað verður um lærdóm frá ríkjum sem hafa náð langt í nýtingu vindorku, líkt og Danmörku og Írlandi, og hvort þær lausnir sem þar hafa verið þróaðar dugi við íslenskar aðstæður.

Markmiðið er að varpa ljósi á hvaða tæknilegu og rekstrarlegu úrbætur þarf til að styðja við örugga og árangursríka innleiðingu vindorku á Íslandi.

Sýnendamálstofa | Raforkuverð á Íslandi

Fimmtudaginn 22. maí kl. 14:00 | Svalir | Ágústa Steinunn Loftsdóttir

Raforkuverð á Íslandi 2025 er ítarlegasta samantekt á raforkumarkaðinum sem gerð er á Íslandi. Í þessari skýrslu koma fram upplýsingar um raforkuverð frá því að raforkumarkaðurinn var gefinn frjáls árið 2005, og í einhverjum tilfellum enn lengra aftur í tímann.

Teknar eru saman upplýsingar um raforkuverð til heimila, fyrirtækja og stórnotenda, verð á heildsölumarkaði, verð í kauphöllum, verð á upprunaábyrgðum, opinberar álögur og niðurgreiðslur, auk þess sem verð á Íslandi eru borin saman við verð erlendis. Nýtt í þessari útgáfu er m.a. verðspá og verðvísitölur. Að auki er bætt í samanburð erlendis og verð á kauphöllum.

Nánari upplýsingar um Orkuverðsskýrsluna.

Sýnendamálstofa | Ný tækni í loftinu: Drónar og mælingar

Föstudaginn 23. maí kl. 10:00 | Svalir | Friðþór Sófus Sigmundsson

Ný tækni í loftinu: drónar og mælingar gefur innsýn í fjölbreytta og öfluga þjónustu mælingateymis EFLU á sviði mælinga, kortlagningar og gagnaúrvinnslu. Þar sameinast nýjustu tækni, nákvæm vinnubrögð og áratuga reynsla í verkefnum sem spanna allt frá almannavörnum í Grindavík og eftirliti í Vatnajökulsþjóðgarði yfir í gagnagrunnsþjónustu fyrir sveitarfélög og orkufyrirtæki. Farið verður yfir dæmi þar sem drónar, þrívíddarskönnun og hnitmiðuð gögn eru nýtt til að skapa landmódel, hæðarlíkön, ásýndarmyndir og kort sem nýtast í ákvarðanatöku, skipulagi og öryggismálum. Fjallað verður um hraða og örugga gagnamiðlun, þróun sérlausna á vefsjám og hvernig öflug samvinna milli drónateymis, gagnalands og viðskiptavina tryggir árangur.

Nánari upplýsingar um þjónustu EFLU á þessu sviði.

Vinnustofa um vatnshlot

Föstudaginn 23. maí kl. 13:00 | Hamrar | Helga J. Bjarnadóttir & Snævarr Örn Georgsson

Gera þarf áhrifamat vatnshlota áður en sótt er um leyfi fyrir hvers kyns framkvæmdum. Enn ríkir þó ákveðin óvissa um það hve langt eigi að ganga í rannsóknum, hve umfangsmiklar þær eigi að vera o.s.frv.

Í vinnustofunni fáum við hagsmunaaðila að borðinu, stærri og minni framkvæmdaraðila, leyfisveitendur og sérfræðinga sem að áhrifamati koma til að ræða þessi mál.

Skv. lögum um stjórn vatnamála og vatnatilskipun þarf að framkvæma áhrifamat á vatnshlot áður en sótt er um leyfi fyrir hvers kyns framkvæmdum og rekstri. Enn ríkir þó ákveðin óvissa um hvernig eigi að innleiða og framkvæma áhrifamatið í umhverfismats-, skipulags- og leyfisferlum framkvæmda.

• Hver ber ábyrgð á því að meta grunnástand vatnshlota?
• Þarf að rannsaka alla gæðaþætti vatnshlota?
• Hvað segir ástandsflokkun vatnshlota okkur?
• Valda bara nýframkvæmdir álagi á vatnshlot, hvað með núverandi rekstraraðila?

Dagskrá

Fundarstjóri: Helga J. Bjarnadóttir

Kl. 13:00 Opnun vinnustofu.

• Erindi 1: Sjónarmið sérfræðings í mati á umhverfisáhrifum. Snævarr Örn Georgsson, EFLA
• Erindi 2: Reynsla framkvæmdaraðila af vinnu við áhrifamat fyrir vatnshlot. Ólafur Arnar Jónsson, Landsvirkjun
• Erindi 3: Kröfur í lögu, upplýsingar frá stjórnvaldi / leyfisveitanda, Marianne Uos

Kl. 13:30: Panelumræður að erindum loknum.

Pallborð/umræður að erindum loknum:

• Snævarr Örn (EFLA)
• Ólafur Arnar Jónsson (Landsvirkjun)
• Marianne Jensdóttir Fjeld (Umhverfis- og orkustofnun)
• Andri Teitsson (Orkusalan)