Um þessar mundir vinnur EFLA að endurskoðun aðalskipulags með sjö sveitarfélögum víðsvegar um landið. Slík vinna er umfangsmikil og tekur að jafnaði tvö til þrjú ár.
Starfsmenn EFLU hafa áratuga reynslu í vinnu við aðalskipulagsmál og hafa undanfarna mánuði unnið að endurskoðun aðalskipulags fyrir sjö sveitarfélög; Árborg, Ásahrepp, Hvalfjarðarsveit, Rangárþing eystra, Seyðisfjarðarkaupstað, Skeiða- og Gnúpverjahrepp og Sveitarfélagið Ölfus.
Horft til framtíðar varðandi þróun og þarfir íbúa
Endurskoðun aðalskipulags tekur yfirleitt um 2-3 ár og ber sveitarstjórn ábyrgð á að slík vinna fari fram reglulega. Við gerð aðalskipulags þarf að horfa til þróunar sveitarfélagsins síðustu ár og þarfa þess til framtíðar. Byggja þarf stefnu aðalskipulags á skipulagslögum og fyrirliggjandi stefnu ríkis og sveitarfélaga. Í aðalskipulagi er sett fram stefna um landnotkun, byggðaþróun og byggðamynstur, samgöngu- og þjónustukerfi og umhverfismál.
Skipulagsáætlanir eru unnar samkvæmt skipulagslögum og vinnur EFLA skipulagsuppdrætti á stafrænu formi og færir í landupplýsingakerfi, en frá 1. janúar 2020 er skilt að skila aðalskipulagsuppdráttum á slíku formi.
Víðtæk reynsla í skipulagsmálum hjá EFLU
Þegar sveitarfélög semja um ráðgjöf vegna skipulagsmála vegur reynslan þungt í slíkri vinnu því að mörgu er að huga í málaflokknum. Innan raða EFLU býr mikil reynsla og víðtæk þekking í skipulagsmálum. Sérfræðingar fyrirtækisins hafa komið að fjölmörgum slíkum verkefnum víða um landið og eru verkefni EFLU á sviði aðalskipulagsmála fjölbreytt.
Myndin sýnir framvindu verkefna m.v. stöðuna í apríl 2020 - Hægt er að smella á mynd til að stækka.