Verkefni EFLU um fyrirhugaða landtengingu rafmagns fyrir uppsjávarskip hefur vakið töluverða athygli. Skoðaðir hafa verið fjárhagslegir og umhverfislegir ávinningar sem skapast við landtengingu uppsjávarskipa í sjávarútveginum.
Aflmeiri landtengingar fyrir sjávarútveg
Löndun á afla úr uppsjávarskipi í vinnslulínur fiskiðjuvera krefst töluverðrar orku. Í dag er sú orka framleidd með olíudrifnum rafölum um borð í skipi á meðan löndun stendur en löndunartími skips í uppsjávarvinnslu getur verið á annan sólarhring. Töluverður ávinningur er því fólginn í að nota raforku frá landi í stað olíu um borð í skipum við löndun á hráefni.
EFLA hefur útfært fyrir Síldarvinnsluna í Neskaupstað landtengingu fyrir uppsjávarskip fyrirtækisins þannig að hægt verður að taka út alla olíunotkun skips á meðan löndun stendur yfir.
Verkefnið og forsendurnar miðast við landtengingu sem aðlöguð er að rekstrarspennu viðkomandi skips.
Tæknilegar forsendur
Miðað var við eftirfarandi forsendur við útfærslu verkefnis:
- Að kerfið ráði við 500kWst stöðugt álag frá skipi
- Kerfið þarf að geta afgreitt bæði 440V/60Hz og 690V/60Hz
- Kerfið þarf að hafa möguleika á samfösun við viðkomandi skip
- Notast verður við rými sem þegar er til staðar undir tækjabúnað í landi
- Einungis eitt skip tengist kerfi í einu
Umhverfisvænn og fjárhagslegur ávinningur
Fjárhagslegur og umhverfislegur ávinningur sem skapast við landtengingu uppsjávarskipa er:
- Orkukostnaður lækkar
- Minni óvissa gagnvart sveiflum á orkuverði (olíu)
- Notaður er innlendur og „grænn“ orkugjafi
- Loftmengun frá skipi ekki til staðar meðan skip er við bryggju
- Minna slit á vélbúnaði um borð
- Betra vinnuumhverfi þar sem hljóðmengun og titringur er ekki í vélarúmi skips
- Styrkir ímynd fyrirtækisins
Fjárhagslegur kostnaður
Kostnaðaráætlun við 500 kW kerfi og breytingar á fyrirliggjandi skipum er eftirfarandi:
- Kostnaður við kerfi í landi er áætlaður um 60 m.kr. (spennir, umbreytir, aflskápar og lagnir ásamt breytinu á rými og tengibúnaði á bryggju við skip).
- Kostnaður við að breyta skipi fyrir landtengingu er áætlaður 9-12 m.kr.
- Endurgreiðslutími fjárfestingar á kerfi í landi er um 3 ár
- Ef þremur eldri skipum er breytt til að geta landtengst er endurgreiðslutími heildarfjárfestingar áætlaður um 5 ár.
Það er fjárhagslega hagstæðara að setja búnað fyrir landtengingu í skip þegar um er að ræða nýsmíði skips. Kostnaðurinn við slíkar breytingar er helmingi lægri en þegar breyta á kerfi í eldra skipi.
Getur tekið sex mánuði
Að útfærslu verkefnis koma að hönnuðir, tæknimenn og vélstjórar ásamt framleiðendum og söluaðilum búnaðar. Gert er ráð fyrir að verktími taki um 6 mánuði, þar sem afhending búnaðar (spennar/umbreytar) getur tekið allt að 4-5 mánuði.