Föstudaginn 6. apríl, verður Dagur verkfræðinnar haldinn á Hilton Reykjavík Nordica. Markmiðið með deginum er að kynna verkfræðina, spennandi störf og verkefni á sviðinu ásamt því að efla tengsl og samheldni innan greinarinnar. Starfsfólk EFLU tekur virkan þátt í deginum og flytja tveir starfsmenn okkar erindi.
Hannað og byggt á umhverfisvænni hátt
Helga Jóhanna Bjarnadóttir, sviðstjóri umhverfissviðs EFLU, ætlar að fjalla um hvernig hægt er að hanna og byggja á umhverfisvænni hátt. Hvaða þættir skipta máli þegar kemur að umhverfisáhrifum bygginga, hvernig hægt er að nýta vistferilsgreiningar í hönnunarferlinu og hvar í ferlinu helstu áhrifin verða. Þá verða tekin dæmi um niðurstöður greiningar á íslenskum byggingum og byggingarefnum.
Helga Jóhanna Bjarnadóttir
Íslensk hönnun göngubrúa
Magnús Arason, fagstjóri brúasviðs EFLU, mun fjalla um hönnun brúa og verkefni tengd samgöngumálum. Sagt verður frá áhugaverðum verkefnum á Íslandi og í Noregi, en heilmikil uppbygging á göngu- og hjólastígum í Osló stendur yfir um þessar mundir sem EFLA tekur þátt í, meðal annars með hönnun á göngubrúm.
Dagur verkfræðinnar hefst kl 13.00, föstudaginn 6. apríl og er aðgangur ókeypis. Hægt er að skoða dagskrá og skrá þátttöku á vef Verkfræðingafélags Íslands.
Magnús Arason