EFLA veitti styrk úr Samfélagssjóði sínum til stærðfræðikeppninnar Pangea og var að auki með formlega aðkomu að úrslitakeppninni sem fór fram í Menntaskólanum við Hamrahlíð laugardaginn 18. maí. Þar flutti Helga J. Bjarnadóttir, sviðsstjóri samfélags hjá EFLU, ávarp á viðburðinum.
Haldin í tíunda skipti
Stærðfræðikeppni Pangea er haldin árlega af Félagi Horizon í samstarfi við stærðfræðinema Háskóla Íslands og var þetta í tíunda sinn sem hún fór fram hér á landi. Keppnin, sem er ætluð nemendum í 8. og 9. bekk grunnskóla, er orðin langstærsta stærðfræðikeppni sinnar tegundar á Íslandi.
Í ár tóku alls 4.689 nemendur þátt, frá 62 skólum víðs vegar um landið. Hundrað hæst settu nemendurnir fengu boð í úrslitakeppnina, þar sem keppt var til verðlauna, en einnig var boðið upp á veitingar og skemmtiatriði.
Ræða Helgu veitti innblástur
EFLA lagði til fjárstuðning með keppninni og átti jafnframt þátt í dagskrá hennar. Helga J. Bjarnadóttir flutti ræðu á meðan beðið var eftir úrslitunum þar sem áhersla var lögð á mikilvægi stærðfræði í samfélaginu og í starfi verkfræðinga. Þar kom m.a. fram hvernig stærðfræðin er notuð daglega innan EFLU, hvort sem það snýr að hönnun brúa og bygginga, útreikningum í tengslum við raforkuflutning eða þróun lausna til að takast á við loftslagsmál og mengun.
„Fyrir okkur hjá EFLU er stærðfræðin ekki bara eitthvað sem við lærðum í skóla. Hún er okkar daglega verkfæri,“ sagði Helga meðal annars í ávarpi starfsfólks EFLU. „Við viljum með þessu styðja við það að börn og unglingar upplifi að stærðfræði getur verið spennandi og nytsamleg og í raun eru öll ungmennin sem þarna voru sigurvegarar enda búin að afreka það að komast í úrslitin. Pangea-keppnin er frábær vettvangur til að auka áhuga ungmenna á stærðfræði og gagnsemi hennar og eiga skipuleggjendur mikið hrós skilið enda hefur keppnin náð til grunnskóla um land allt.
Viðbrögðin við ávarpi Helgu voru afar jákvæð og sögðu skipuleggjendur það hafa verið mjög dýrmætt að fá innblástur frá starfandi verkfræðingi sem sýndi krökkunum hvernig stærðfræðin nýtist í raunveruleikanum.
EFLA óskar öllum þátttakendum og sigurvegurum Pangea 2025 til hamingju.
