Staðsetning nýs Tækniskóla hefur verið staðfest af stjórnvöldum, Hafnarfjarðarbæ og Tækniskólanum og mun rísa við Suðurhöfnina í Hafnarfirði. EFLA vann valkostagreiningu fyrir framtíðarhúsnæði skólans í samstarfi við ráðgjafarfyrirtækið KPMG.
EFLA vinnur að undirbúningi framtíðarhúsnæðis Tækniskólans
Aðsókn í Tækniskólann hefur aukist mikið á undanförnum árum og bygging nýs skóla því orðin brýn.
Í skólanum eru rúmlega 270 starfsmenn og yfir þrjú þúsund nemendur eru skráðir þar í nám veturinn 2020-2021. Tækniskólinn er í dag starfræktur í níu byggingum víða um höfuðborgarsvæðið og mun fyrirhuguð bygging sameina alla starfsemina undir einu þaki.
Unnin var frumþarfagreining fyrir skólann þar sem stærðarþörfin var metin, kostnaðaráætlun fyrir framkvæmdina sett fram og byggingartími metinn út frá ólíkum forsendum. Einnig var ferðatími nemenda og starfsfólks metinn út frá mismunandi staðsetningum á höfuðborgarsvæðinu. Við mat lóðakosta var litið til til þarfa starfseminnar og tekið tillit til þeirrar spennandi hugmyndafræði sem stjórnendur leggja upp fyrir starfsemi skólans í framtíðinni.
Lesa má nánar um næstu skref á vef Stjórnarráðsins.