EFLA tók þátt í þróun og hönnun Hringrásarveggjarins sem verður til sýnis á HönnunarMars, á samsýningunni Gjörið svo vel að líta inn í Rammagerðinni. Verkefnið er samstarfsverkefni EFLU, Reykjavík Glass, Basalt arkitekta og Jáverks, og hlaut styrk frá umhverfis-, orku- og loftslagsráðuneytinu árið 2022.
Sérfræðiþekking sem nýtist
EFLA hefur frá upphafi tekið virkan þátt í verkefninu og lagt fram sérfræðiþekkingu á sviði burðarþols, hljóðvistar og brunavarna. Hringrásarveggurinn er hluti af þróunarvinnu við hringrásarbyggingarefni og stendur sýningin yfir alla helgina.
Í nýjustu útgáfu veggjarins, sem nú er sýnd almenningi, hefur EFLA einnig komið að samsetningu veggjarins og hönnun hljóðþéttingar. Veggurinn er 2,9 metrar á lengd og 2,3 metrar á hæð.
Endurnýta, endurvinna og endurnota
Markmið verkefnisins er að styðja við hringrásarhagkerfið með þróun innri vegglausna úr endurunnum efnum. Núverandi veggur er úr endurnýttu gleri frá Íspan Glerborg og unninn í samstarfi við Reykjavík Glass. Glereiningarnar eru hannaðar þannig að hægt er að taka þær niður og setja upp á nýjum stað með einföldum hætti – án þess að tapa gæðum.
Hugmyndafræðin að baki veggnum gengur út á að skapa efnisbanka – geymslu á verðmætum efnivið fyrir framtíðina, þar sem öll efni veggjarins má endurnýta, endurvinna og endurnota.
Við hvetjum öll til að líta við og kynna sér þetta spennandi verkefni sem sýnir í verki hvernig hægt er að nýta úrgang á nýstárlegan og sjálfbæran hátt í byggingariðnaði framtíðar.
1 / 3
2 / 3
3 / 3