Fyrir helgi fóru fram kynningar sumarstarfsfólks EFLU fyrir starfsfólki á Lynghálsi 4. Þar kynnti sumarstarfsfólk sem hefur unnið hjá fyrirtækinu í sumar hvað þau hafa verið að fást við og hvaða verkefnum þau hafa sinnt hjá EFLU yfir sumartímann.
Sumarstarfsfólk EFLU var ráðið inn bæði til höfuðstöðvanna á byggingarsvið, orkusvið, iðnaðarsvið og stoðsvið og á svæðisskrifstofur á vestur, austur-, norður-, og suðurlandi.
Þau sem voru ráðin til sumarstarfa voru ýmist nýráðin eða höfðu áður verið í sumarstörfum hjá EFLU og fóru einhver úr hlutastarfi eða starfsnámi yfir í sumarstarf.
Fjölbreytt aðkoma að verkefnum
Verkefnin sem voru kynnt og sumarstarfsfólk vann að í sumar voru af fjölbreyttum toga og tilheyrðu ýmist þjónustusviði EFLU eða voru hluti af stærri rannsóknar- og þróunarverkefnum.
Meðal verkefna má nefna öryggis- og gæðaeftirlit tengt byggingum, jarðkannanir og mælingar, landtenging skemmtiferðaskipa, landslagshönnun í Borgarfirði og Hvalfirði, hönnun dælustöðvar, kortlagning á þörungarækt á Íslandi og tækifærum tengd því, kolefnisútreikningar, ýmsir útreikningar á raforkuverði og gervigreindarmódel fyrir hraðhleðslustöðvar.
Erfitt að hringja símtöl
Áskoranir í starfi geta verið margar og misjafnt hvað vefst helst fyrir fólki. Þegar nemendur eða útskrifaðir nemendur eru ráðnir til starfa hjá EFLU yfir sumartímann er lögð áhersla á að reynslan af starfinu sé raunverulega hagnýt og sambærileg því sem fólk kemur til með að upplifa þegar farið er út á vinnumarkaðinn. Eitt af því sem kom fram í kynningunum var að sumarstarfsfólki þætti erfitt að hringja símtöl tengd starfinu en þaðað hringja símtöl er sjaldan hluti af háskólanámi.
Eins kom fram hvað hefði komið sumarstarfsfólki mest á óvart og staðið helst upp úr eftir sumarið hjá EFLU. Í því samhengi kom fram að sumarstarfsfólk orkusviðs hafði upplifað magnaða heimsókn á Suðurnesin. Heimsóknin var hluti af árlegum orkusviðsdegi starfsfólks og var það Jón Haukur Steingrímsson, sérfræðingur EFLU á sviði jarðtækni og jarðfræði, sem leiddi starfsfólk um svæðið og skoðaði með þeim eftirköst Sundhnúkseldanna.
Annað sem kom fram var góður hádegismatur, fótbolti starfsfólks í hádeginu á föstudögum og loks starfsfólkið hjá EFLU og tengslanetin sem sumarstarfsfólk náði að mynda.
Sumarstarfsfólk kemur ár hvert með ferskan blæ inn í starfsemi EFLU. Við þökkum þeim kærlega fyrir frábært sumar og hlökkum til að sjá þau aftur sem allra fyrst.