EFLA leggur mikla áherslu á sjálfbærar lausnir í byggingariðnaði og veitir alhliða ráðgjöf varðandi vistvæna hönnun og vottun. Nýverið bættist fimmti viðurkenndi matsmaðurinn í hóp EFLU sem hefur réttindi til að vinna samkvæmt vistvottunarkerfi BREEAM.
Matsmenn fyrir vistvottun bygginga
Markmið vistvænnar hönnunar og vottunar er að byggingar (og innviðir) hafi sem minnst umhverfisáhrif á líftíma sínum, séu heilsusamlegar fyrir notendur og að viðhaldsþörf verði sem minnst. Mikil vitundarvakning hefur orðið á mikilvægi vistvænnar hönnunar og færst hefur í vöxt að eigendur bygginga óski eftir vottun.
Með alþjóðlegu vistvottunarkerfi BREEAM er mat lagt á marga þætti byggingarinnar eins og umhverfisstjórnun á byggingar- og rekstrartíma, innivistarþætti, orkunýtingu, úrgangsstjórnun og vistfræðileg gæði í nánasta umhverfi.
Mismunandi réttindi fyrir ólík verkefni
EFLA hefur komið að BREEAM vottunum á 16 byggingum hérlendis sem ýmist hafa hlotið fullnaðarvottun eða eru í matsferli. Mismunandi réttindi eru veitt til að sinna ólíkum viðfangsefnum og hefur EFLA nú á að skipa fimm matsmönnum sem hafa eftirfarandi vistvottunarréttindi frá BREEAM:
- Vistvottun á nýbyggingum
- Vistvottun á endurgerð bygginga
- Vistvottun á byggingum í notkun
- Vistvottun fyrir skipulagsáætlanir
- BREEAM AP varðandi innleiðingu vistvænnar hönnunar í nýbyggingaverkefni
Vistvottunartengd verkefni EFLU
- Gestastofa á Skriðuklaustri
- Sjúkrahótel nýs Landspítala
- Skrifstofubygging að Lynghálsi 4