EFLA sá um for- og verkhönnun á nýjum vegkafla og nýrri brú yfir Varmá, austan við Hveragerði, þar sem opnað var fyrir umferð í liðinni viku. Vegurinn myndar nýja tengingu milli Sunnumarkar í Hveragerði og Ölfusvegar austan Varmár og er verkefnið hluti af breytingu á Þjóðvegi 1 á milli Hveragerðis og Selfoss sem er samstarfsverkefni Vegagerðarinnar og Hveragerðisbæjar.
Ný brú yfir Varmá opnuð fyrir umferð
Brúin er 47,8 metra löng eftirspennt plötubrú í þremur höfum með 7 metra akbraut, gangstétt og hjólareinar báðum megin akbrautar, heildarbreidd 14,6 metrar. Austan Varmár liggur nýr reiðstígur undir brúna, 4 metra breiður með 0,5 metra öxlum.
Varmá, norðan Suðurlandsvegar, er á náttúruminjaskrá. Þar er töluverð fiskgengd og því var reynt að valda sem minnstu raski á árfarveginum á framkvæmdatíma. Til að mynda var aðeins leyfilegt að vinna í árfarveginum frá 30. desember 2021 til 1. apríl 2022 með tilliti til veiðitíma og göngutíma fiska.
Auk þess að sjá um veg- og brúarhönnun sá EFLA um lýsingarhönnun á Sunnumörk, aðlögun vatns- og fráveitu á svæðinu, skilti og yfirborðsmerkingar, eftirfylgni á verktíma og fyrirspurn um matskyldu vegna umhverfisáhrifa framkvæmdanna við Varmá.
![A highway with multiple lanes, clear road marking and pedestrian path to the side](/_next/image?url=https%3A%2F%2Fefla-is.payload.is%2Fmedia%2Fny-bru-yfir-varma-opnud-fyrir-umferd-1.jpg&w=2048&q=80)
Ný brú yfir Varmá. Mynd | Vegagerðin.