Starfsfólk EFLU á Umhverfisráðstefnu Austurlands Starfsfólk EFLU á Umhverfisráðstefnu Austurlands

Fjölbreytt dagskrá var á ráðstefnunni þar sem leiðandi sérfræðingar í byggingariðnaði og umhverfismálum komu saman. Starfsfólk EFLU kom þar víða við sögu, bæði í fyrirlestrum og stjórn ráðstefnunnar. Helga Jóhanna Bjarnadóttir, sviðsstjóri samfélagssviðs EFLU og sérfræðingur í vistvænni hönnun og loftslagsmálum, stýrði ráðstefnunni. Helga hefur áralanga reynslu af ráðgjöf í umhverfis- og loftslagsmálum og situr í Loftslagsráði. Hún hefur einnig sinnt vottun mannvirkja samkvæmt alþjóðlega vistvottunarkerfinu BREEAM og beitt sér fyrir innleiðingu sjálfbærra lausna í byggð og skipulagi.

Einnig flutti Alexandra Kjeld, umhverfisverkfræðingur hjá EFLU, fyrirlestur á ráðstefnunni undir yfirskriftinni Verðmæti í byggð. Þar ræddi hún meðal annars um mikilvægi þess að draga úr losun gróðurhúsalofttegunda frá mannvirkjagerð. Alexandra vakti athygli á því að frá og með 1. september 2025 verði skylt að skila inn kolefnissporsútreikningum fyrir nýbyggingar sem sótt er um leyfi fyrir, skref sem undirstrikar aukna áherslu á ábyrga nýtingu auðlinda og samspil byggðar og umhverfis. Fyrirlestur hennar fjallaði jafnframt um hvernig hægt er að byggja með vellíðan, samfélagsleg áhrif og kolefnisspor að leiðarljósi.

Meðal annarra fyrirlesara á ráðstefnunni voru Arnhildur Pálmadóttir, arkitekt og handhafi umhverfisverðlauna Norðurlandaráðs, Sunna Ólafsdóttir, efnaverkfræðingur hjá Gerosion Ltd, Jóhanna Helgadóttir, skipulagsfræðingur og arkitekt hjá Nordic Office of Architecture á Íslandi, Gunnlaugur Guðjónsson, sviðsstjóri hjá Landi og skógi, Skarphéðinn Smári Þórhallsson landfræðingur, auk þeirra sem hugleiðingar heimamanns voru fluttar af Láru Vilbergsdóttur, verkefnastjóra og hönnuði.

Í lok ráðstefnu var haldið pallborð sem Helga Jóhanna stýrði þar sem spunnust áhugaverðar umræður meðal annars um nýtingu nærtækra hráefna, nýsköpun, stuðning til frumkvöðla og um breytt hugarfar í skipulagi og hönnun. Í lok ráðstefnu var þátttakendum boðið í heimsókn á Vallanes þar sem staðarhaldarar og frumkvöðlar, Eymundsson Magnússon og Eygló Björk Ólafsdóttir, sögðu frá fjölbreyttri starfsemi, orkuvinnslu og nýtingu hráefna í ýmist mannvirki eða matvörur.

Ráðstefnan var liður í því að efla umræðu um sjálfbæra framtíð byggðar á Austurlandi og skapa vettvang fyrir samtal milli ólíkra fagaðila, sveitarfélaga og íbúa. Þar var meðal annars rætt um vistvænt skipulag, endurnýtingu byggingarefna og nýtingu innlendra auðlinda á borð við timbur og steinsteypu með minnkun umhverfisáhrifa að leiðarljósi.

Á sama tíma og þessi mikilvægi umræðuvettvangur fer fram var nýr þáttur í Austurland-hlaðvarpinu gefinn út, þar sem rætt er við bæði Helgu Jóhönnu og Alexöndru um efni ráðstefnunnar og þær áskoranir sem mannvirkjagerð stendur frammi fyrir á komandi árum. Þar var meðal annars velt upp spurningunni: Hvernig byggjum við árið 2050?