Sigurður Thorlacius, starfsmaður á umhverfissviði EFLU, hlaut nýverið verðlaun við útskrift frá tækniháskólanum ETH Zürich í Sviss. Verðlaunin voru veitt fyrir háa meðaleinkunn og framúrskarandi meistaraverkefni í umhverfisverkfræði. Verðlaunin veittu svissnesku stofnanirnar Geosuisse og Ingenieur-Geometer Schweiz.
Verðlaun fyrir framúrskarandi árangur í námi
Í meistaraverkefninu var rannsakað hvernig samkorn (e. aggregates) í jarðvegi brotna niður í rigningu og hvaða áhrif regnstyrkur og vatnsinnihald jarðvegs hefur á niðurbrotið. Niðurstöðurnar munu nýtast í líkangerð af jarðvegsrofi því þar skiptir stærðadreifing samkorna miklu máli. Verkefnið var unnið undir handleiðslu Dr. Rainer Schulin, prófessors í jarðvegsvernd, og til stendur að gefa út vísindagrein um rannsóknina.
Sigurður hefur unnið á EFLU síðan í ágúst og einnig tvö sumur þar áður. Hann hefur fengist við vistferilsgreiningar og fráveituhönnun auk ýmissa annarra verkefna á umhverfissviði.
EFLA óskar Sigurði til hamingju með þennan frábæra árangur.