Verkefni í MiðausturlöndumVerkefni í Miðausturlöndum

Það er Iðnaðarsvið EFLU sem fer fyrir báðum verkefnunum en starfsfólk þess hefur yfirgripsmikla þekkingu og reynslu af verkefnum tengdum álverum í Miðausturlöndum.

Verkefnin eru unnin í samvinnu við Reel Alesa frá Sviss en samstarf þess við EFLU hefur verið afar farsælt og staðið í rúma tvo áratugi. Hlutverk EFLU er að leysa þeirra sérfræðinga af í uppstarti og gangsetningum flókins búnaðar. Um afar ábyrgðarfullt starf er að ræða og mikil pressa á starfsmönnum.

Í Bahrain er verið að að stækka álver Alba og auka framleiðslugetuna í 1,5 milljón tonn. Eftir stækkunina verður álverið stærsta álver heims. Til samanburðar má nefna að samanlögð framleiðsla íslensku álveranna er um 0,8 milljón tonn.

Þá er verið að vinna að gangsetningu súrálsverksmiðju í Sameinuðu Arabísku Furstadæmunum og er gert ráð fyrir að framleiðslan verði 2 milljónir tonna af súráli á ári, sem er 40% af súrálsnotkun beggja álveranna í Furstadæmunum.

Starfsfólk EFLU hefur komið að fjölbreyttum verkefnum í áliðnaðinum, bæði hérlendis og erlendis, og aflað sér sérþekkingar á sviðinu. Verkefnin hafa verið fjölbreytt og má þar nefna hönnun stýrikerfa, forritun og gangsetning hreinsivirkja og margvíslegra flutningskerfa.