Fréttir
Samvinna skiptir miklu máli
Technical University of Denmark, DTU, umhverfisverkfræði, mastersnám, Nýsköpunarsjóður námsmanna,
„Þau hafa tekið mjög vel á móti mér og hafa ávallt verið tilbúin að hjálpa mér þegar ég hef verið í vafa og svara öllum þeim spurningum sem ég hef haft, greinilegt að hér ríkir mjög góður vinnuandi,“ segir Anna Snjólaug Valgeirsdóttir sem var hluti af hópi sumarstarfsfólks EFLU.
-
Anna Snjólaug Valgeirsdóttir.
Anna Snjólaug er 25 ára Reykvíkingur sem hóf störf hjá EFLU í hlutastarfi í desember á síðasta ári og var svo hjá fyrirtækinu í sumar. „Í vor var ég aðallega að aðstoða við gerð umhverfisvöktunar- og sýnatökuskýrslna og líka við sjálfbærniráðgjöf,“ útskýrir Anna sem er stundar mastersnám í umhverfisverkfræði í Technical University of Denmark, DTU.
Ferðast eftir útskrift
Í sumar vann hún svo rannsóknarverkefni styrkt af Nýsköpunarsjóði námsmanna. „Það sneri að því að gera samantekt á stöðu valkvæðra kolefnismarkaða og kortlagningu tækifæra á Íslandi við framleiðslu á vottuðum kolefniseiningum,“ segir Anna og bætir við að henni hafi gengið mjög vel að takasta á við þessi verkefni. „Þökk sé góðu samstarfsfólki.“Anna Snjólaug segir að tíminn hennar hjá EFLU hafi verið góð innsýn inn í það sem koma skal. „Þessi reynsla sýndi mér hvað verkefni á verkfræðistofum geta verið rosalega fjölbreytt og hvað samvinna skiptir miklu máli til að finna lausn á verkefnum,“ segir Anna sem er þegar farin að líta til framtíðar og hvað verður eftir að námi lýkur. „Mig langar að ferðast aðeins eftir útskrift, mögulega til Suður-Ameríku eða Asíu, og svo byrja í fullri vinnu á verkfræðistofu, vonandi hjá EFLU,“ segir Anna Snjólaug að lokum.