Árlegur Steinsteypudagur fór fram nýverið og voru fulltrúar EFLU með kynningarbás, fluttu erindi um steypt burðarvirki í Landsbankanum og birtu grein í Sigmáli, tímariti Steinsteypufélagsins.
Allt um steypu á árlegum Steinsteypudegi
Steinsteypufélagið hefur veg og vanda að ráðstefnunni en markmið þess er m.a. að stuðla að hagnýtri og fræðilegri þróun á sviði steinsteypu og steinsteyputækni á Ísland. Ráðstefnan fór fram föstudaginn 5. nóvember á Grand Hóteli og voru þátttakendur sammála um að mjög vel hafi tekist til með Steinsteypudaginn í ár.
Vistvæn hampsteypa
Það var mál manna að mikilvægt væri að huga að vistvænum lausnum þegar kemur að efnisvali í byggingarframkvæmdum, en eitt af viðfangsefnum EFLU er að þróa og rannsaka lausnir fyrir byggingaiðnaðinn sem eru umhverfisvænni. Af því tilefni birti Ingimar Jóhannsson, byggingarverkfræðingur, áhugaverða grein í fréttablaðinu Sigmáli, og fjallaði um rannsókn EFLU á nýtingu hampsteypu, framleidda úr iðnaðarhampi, við íslenskar aðstæður. Einnig voru helstu niðurstöður rannsóknarinnar tilgreindar, en þær fóru fram á viðurkenndri og vottaðri rannsóknarstofu EFLU. Á kynningarbás EFLU á ráðstefnunni var hampsteypukubbur til sýnis og vakti hann töluverða athygli gesta.
Steypt burðarvirki Landsbankans
Að auki hélt Daði Snær Pálsson, byggingarverkfræðingur hjá EFLU, erindi sem fjallaði um steypu og steypt burðarvirki í nýbyggingu Landsbankans við Austurbakka. Byggingin er með steyptu burðarvirki, aðallega steyptum súlum og plötum með steyptum kjörnum. Óregluleg lögun og aðstæður vegna mannvirkja sem liggja í kringum húsið varð til þess að beita þurfti fjölbreyttum lausnum í steypuhönnun. Steypan gegnir líka því hlutverki að halda grunnvatni frá kjallaranum. Í botnplötum og kjallaraveggi var valin umhverfisvænni steypa með auknu magni af kísilryki og flugösku á kostnað sements sem lækkar kolefnisspor byggingarinnar. Steypan gegnir lykilhlutverki í útliti byggingarinnar að innan þar sem margir fletir eru með sjónsteypu og munstursteypuáferð.
Nemendaverðlaun fyrir lokaverkefni
Á Steinsteypudeginum er veitt viðurkenning til námsmanna sem hafa klárað lokaverkefni á sviði steinsteypu. Í ár hlaut Björgvin Grétarsson verðlaunin fyrir ritverð sína sem fjallar um sker í steypu s.s. skerflutning, helstu breytur sem hafa áhrif á skerstyrk, gerðir skerbrota og mismunandi skerstyrkslíkön. EFLA var eitt af fyrirtækjunum sem veitti styrk til nemendaverðlaunanna í ár og óskar handhafa verðlaunanna til hamingju með viðurkenninguna.