Um þessar mundir fer fram athugun við gosstöðvarnar til að kanna hversu mikið álag jarðstrengir þola af hita og áhlaupi frá hraunflæðinu. Tilgangurinn er að draga lærdóm af tilrauninni sem gæti nýst við sambærilegar aðstæður.
Þola jarðstrengir álag frá hraunflæðinu?
Undanfarið hefur EFLA , ásamt hóp samstarfsaðila, starfað í mynni Nátthaga við gosstöðvarnar í Fagradalsfjalli. Þar fer fram tilraun sem á að svara því hvað gerist þegar hraun rennur yfir jarðstrengi og aðrar lagnir, t.d. ljósleiðara, rafmagnslagnir og vatnslagnir.
Markmið tilraunarinnar er að kanna hvort jarðstrengirnir þoli hitann og áhlaup frá hraunflæðinu ásamt því að draga af því lærdóm sem getur nýst við sambærilegar aðstæður.
Mælibúnaður hefur verið settur ofan í jarðveginn sem mælir bæði hita frá hrauninu og þunga þess. Einnig hefur mælibúnaði verið komið fyrir í skurði sem er varmaeinangraður á mismunandi vegu t.d. með vikri, steinull og möl.
Niðurstöður tilraunarinnar eru háðar því að hraun renni til suðurs úr Nátthaga og yfir jarðveginn þar sem mælibúnaðurinn er. Með áframhaldandi gosvirkni gæti það gerst á næstu vikum.
Verkefnið er unnið fyrir Almannavarnir og Landsnet í samstarfi við Verkís, Jarðvísindastofnun HÍ, Veðurstofu Íslands, Landsvirkjun, Neyðarlínuna, Rafholt, Tensor, Mílu, Gagnaveituna, Hampiðjuna og Lýsir o.fl.
Mælibúnaðurinn ofan í skurðinum er varmaeinangraður á mismunandi vegu.
1 / 6Jón Haukur Steingrímsson og Vigdís Bjarnadóttir frá EFLU við gosstöðvarnar.
2 / 6Einar Sindri Ólafsson frá EFLU.
3 / 6Strengnum var komið fyrir í skurði við ýmsar aðstæður s.s í steinröri, undir vikri, steinull o.fl.
4 / 6Efla hefur einnig komið að gerð varnarmannvirkja í Fagradalsfjalli s.s. leiði- og þvergarða.
5 / 6Hrauntunga upp við leiðigarðinn syðst í Geldingadölum.
6 / 6Varmaleiðnimælingar í skurðbakkanum.