Alda, brú yfir Fossvog

Alda, brú yfir Fossvog, gegnir lykilhlutverki fyrir Borgarlínuna og styður framtíðarsýn um skilvirkari og sjálfbærari samgöngur á höfuðborgarsvæðinu. Með tengingu yfir Fossvog styttast leiðir milli Reykjavíkur og Kópavogs verulega sem eykur aðgengi að atvinnu, þjónustu og útivist fyrir íbúa sveitafélaganna.

Borgarlínan fer um miðju brúarinnar en gangandi og hjólandi vegfarendur hafa aðskildar leiðir sitthvorum megin. Hönnun Öldu miðar að því að virða sérkenni svæðisins og skapa mannvirki sem fellur vel að landslaginu og umhverfinu öllu, um leið og hún uppfyllir kröfur um öryggi og sjálfbærni í samgöngum.

EFLA leiddi þverfaglegt hönnunarteymi verkefnisins og bar ábyrgð á verkefnastjórn, samræmingu fagsviða, for- og verkhönnun og gerð útboðsgagna. Hönnun brúarinnar var unnin í nánu samstarfi við BEAM Architects og náði hönnunarvinnan jafnframt til aðliggjandi Borgarlínunnar, göngu- og hjólastíga beggja vegna Fossvogs, áningarstaða, landmótunar og veitukerfa.

Alda er viðamikið innviðaverkefni og er dæmi um nána samþættingu ólíkra fagsviða, þar sem samgöngur, mannvirki, landslag og veitukerfi fléttast saman í eina heildræna og virðisaukandi innviði.

Sérfræðingar EFLU lögðu fram fjölbreytta þekkingu til verkefnisins, en helstu þjónustuþættir voru:

• Verkefnastjórn og samræming faggreina
• Brúarhönnun og burðarvirki
• Borgarlína, götur og stígar
• Jarðtækni, landfyllingar og sjóvarnir
• Landslagsarkitektúr og almenningsrými
• Rafkerfi og lýsing
• Fráveitu- og ofanvatnskerfi
• Umferðargreiningar og samgöngumat
• BIM og líkanadrifin hönnun
• Vind-, straum- og sveiflugreiningar
• Vistferils- og kolefnissporsgreiningar

Staðsetning brúarinnar í Fossvogi er kjörin fyrir samgöngur en fól jafnframt í sér margvígslegar áskoranir við hönnun:

Hönnun Öldu byggir á ítarlegum greiningum auk þess sem hönnunarteymið studdist við BIM-aðferðarfræði (Building Information Modelling). Með því að vinna alla hönnun í miðlægum upplýsingalíkönum tókst að samræma innviði ólíkra fagsviða á skilvirkan hátt og tryggja gæði vinnuferlisins frá hugmyndastigi að framkvæmd.

Til að stuðla að öryggi, hagkvæmni og jákvæðri upplifun notenda framkvæmdu sérfræðingar EFLU jafnframt fjölda sérhæfðra greininga sem mótuðu hönnun mannvirkisins. Þar á meðal voru:

• Umferðargreiningar
• Greiningar á vindafari
• Straumfræðigreiningar
• Vistferilsgreiningar

Niðurstöður greininganna höfðu áhrif á endanlega útfærslu mannvirkisins og studdu markmið verkefnisins um sjálfbærni og gæði.

Sjálfbærni hefur verið höfð að leiðarljósi við hönnun Öldu allt frá upphafi. Mikil áhersla er lögð á samspil mannvirkisins við náttúru og umhverfi, auk þess sem mikilvægar göngu- og hjólaleiðir á svæðinu haldast opnar og aðgengilegar á framkvæmdartíma.

Í hönnunarferlinu var kolefnisspor hverrar verklausnar greint og vaktað markvisst. Þessar greiningar hafa stutt við upplýsta ákvarðanatöku sérfræðinga og þannig hjálpað við að draga markvisst úr umhverfisáhrifum. Þá hafa allar aðrar greiningar sem unnar voru fyrir verkefnið, hvort sem þær lutu að vistkerfum, vindafari, straumum, hljóðvist eða útivist, verið rýndar sérstaklega með tilliti til sjálfbærni- og umhverfisþátta.

Að neðan má sjá myndefni sem unnið hefur verið gegnum hönnunarferil brúarinnar, allt frá samkeppni að útboðshönnun. Myndirnar gefa góða hugmynd um hvernig brúin í heild og einstakir hlutar hennar munu falla að umhverfinu í Fossvogi og verða hluti af almenningsrýminu.

Hægt er að fylgjast nánar með þróun framkvæmda á vef Borgarlínunnar