Fréttir

Þrívítt módel af eldgosinu í Geldingadölum

25.3.2021

Starfsfólk EFLU á sviði myndmælinga og kortagerðar fór í vettvangsferð að eldgosinu í Geldingadölum. Tilgangurinn var að kanna aðstæður á svæðinu og fljúga dróna yfir svæðið til að setja fram kortalíkan í þrívídd.

  • Gos í Fagradalsfjalli - EFLA
    Eldgosið á Reykjanesskaga hefur vakið mikla athygli enda sjónarspilið afar tilkomumikið.

Gossvæðið hefur vakið mikla athygli hérlendis sem og erlendis og fylgjast jarðvísindamenn vel með framvindunni á svæðinu. Margvísleg gagnasöfnun á sér stað á gossvæðinu og þar gegna drónar mikilvægu hlutverki. Með drónum, líkt og EFLA notar í sínum störfum, er hægt að meta breytingar á svæðinu, vakta jarðlög og setja gögn fram í þrívíðu kortalíkani til að greina betur ástand svæðisins.

Auðvelt er að opna þrívíddarlíkanið í vafra, þysja inn og út á myndinni og skoða eldgosið út frá öðru sjónarhorni.

Umbrotin á Reykjanesskaga eru söguleg, enda hefur ekki gosið á skaganum í 781 ár. Eldgosið er hluti af ferli sem hófst með jarðskjálftahrinu sem hefur staðið með hléum nú í 15 mánuði. 

Mælingar jarðefnafræðinga benda til þess að kvikan sé að koma af 14-16 km dýpi, eða á mörkum jarðskorpu og möttuls. Hitastig kvikunnar sem kemur upp á yfirborð er um 1180-1190 °C heit.

Sérfræðingar EFLU flugu dróna í kringum strýtuna þann 23. mars til að myndmæla þennan magnaða viðburð. Aðstæður til myndmælinga voru nokkuð góðar þó svo að reykurinn frá gosinu hafi í einstaka tilfellum hulið strýtuna.

Myndagallerí

Gos í Fagradalsfjalli - EFLASjónarspilið úr eldgosinu á Reykjanesskaga er afar tilkomumikið.

Gos í Fagradalsfjalli - EFLATöluverð gasmengun er úr eldgosinu og mikilvægt að fara varlega á svæðinu.

Gos í Fagradalsfjalli - EFLAMikill fjöldi fólks var samankominn til að njóta sjónarspilsins sem fyrir augun bar enda um einstakan jarðfræðiviðburð að ræða.

Gos í Fagradalsfjalli - EFLAGeldingadalir hefur breyst töluvert eftir að eldgos hófst föstudaginn 19. mars 2021.

EFLA veitir margvíslega þjónustu á sviði kortagerðar og myndmælinga