KolefnissporKolefnisspor

Við útreikninga á kolefnisspori fyrirtækisins notar EFLA aðferðafræði Greenhouse Gas Protocol. Kolefnisspor fyrirtækis tengist bæði beinni losun GHL, sem fyrirtækið hefur stjórn á, og óbeinni losun GHL frá starfseminni. Hjá EFLU tengist bein losun GHL notkun bifreiða í rekstri EFLU. Óbein losun EFLU samkvæmt Greenhouse Gas Protocol er af völdum notkunar rafmagns og losunar vegna aksturs starfsfólks á eigin bílum og bílaleigubílum á vegum EFLU. Einnig veldur losun vegna flugs starfsfólks óbeinni losun GHL, sem og meðhöndlun úrgangs. Þetta eru þeir þættir sem tekið var tillit til þegar loftslagsmarkmið fyrirtækisins voru sett miðað við árið 2015. EFLA upplýsir um fleiri þætti sem stuðla að óbeinni losun GHL í starfseminni í umfangi 3, svo sem akstur starfsfólks til og frá vinnu, matarinnkaup og innkaup á raftækjum, sjá hér fyrir aftan.

Við útreikninga á losun GHL notar EFLA losunarstuðla sem Umhverfisstofnun gefur út reglulega, þegar það á við. Einnig notar EFLA hugbúnaðarlausnirnar Matarsporið og Klappir ásamt umhverfisupplýsingum viðkomandi raftækja (e. EPD Environmental Product Declaration), þar sem þær liggja fyrir, sem og aðrar reiknivélar eins og við á, svo sem fyrir flug.

Losun gróðurhúsalofttegunda á hvert stöðugildi var 0,57 tonn CO2-ígilda árið 2024 og var um 60% lægri en árið 2015 (1,43 tonn CO2-ígilda/stöðugildi). Loftslagsmarkmið EFLU fyrir árið 2024 var að halda kolefnisspori á stöðugildi undir 0,96 tonnum CO2-ígilda. Hins vegar er kolefnisspor ársins á hvert stöðugildi 2024 22% hærra en það var árið 2023 (0,47 tonn CO2-ígilda/stöðugildi), sem tengist aðallega meiri losun vegna flugs innanlands og erlendis á milli ára og akstri starfsfólks á vegum vinnunnar. EFLA er í stöðugum vexti bæði innanlands sem og erlendis, sem hefur í för með sér aukin samskipti og umsvif á milli landa.

EFLA leggur áherslu á að auka upplýsingagjöf varðandi umfang 3 í starfsemi sinni. Þetta eru þættir sem fyrirtækið hefur hefur óbein áhrif á og voru ekki taldir fram í umfangi 3, þegar markmið voru sett miðað við árið 2015. Hér er um að ræða losun vegna kaupa á nýjum raftækjum (tölvur, skjáir og símar), losun vegna innkaupa á matvöru í mötuneyti í höfuðstöðvum EFLU og aksturs starfsfólks til og frá vinnu. Losun tengd þessum þáttum var um 394 tonn, eða um 1,1 tonn CO2-ígilda /stöðugildi, sem er lækkun um 18% á milli ára miðað við 1,3 tonn CO2-ígilda /stöðugildi árið 2023.

Þegar tekið er tillit til aukins umfangs í óbeinni losun EFLU er heildarlosun GHL á hvert stöðugildi um 1,7 tonn CO2-ígilda, eða samtals um 634 tonn CO2-ígildi sem er 8% lækkunum frá árinu á undan, sem var 1,8 tonn CO2-ígilda/stöðugildi.