Viðburðir
EFLA tók þátt í fjölda viðburða á árinu 2024.
Framadagar
EFLA tók þátt í Framadögum sem voru haldnir í Háskólanum í Reykjavík í febrúar. Þar hittu fulltrúar EFLU ungt námsfólk sem vildi kynna sér fyrirtækið og starfsmöguleika, hvort sem var til framtíðar eða vegna sumarstarfa.
Viðskiptavinaboð
EFLA hélt fjögur vel heppnuð viðskiptavinaboð á árinu. Fyrsta boðið fór fram í Ketilhúsinu á Akureyri í mars. Í maí fjölmenntu viðskiptavinir í Gamla bíó í Reykjavík á fallegum vordegi. Á Ísafirði var viðskiptavinaboð í Edinborgarhúsinu, samhliða EFLU þingi. Í lok árs var svo viðburður í Risinu á Selfossi þar sem Suðurland var í fókus. EFLA hyggst halda áfram með slíka viðburði á komandi ári, í takt við þær góðu viðtökur sem þeir hafa fengið.
Nánar um viðskiptavinaboð í ReykjavíkNánar um viðskiptavinaboð á NorðurlandiNánar um viðskiptavinaboð á VestfjörðumNánar um viðskiptavinaboð á Suðurlandi
Vísindaferðir
EFLA stóð fyrir vísindaferðum á Norðurlöndunum í nóvember. Háskólanemendum í Svíþjóð, Danmörku og Noregi var boðið til viðburðar í hverju landi fyrir sig þar sem starfsfólk EFLU kynnti fyrirtækið og þá starfsmöguleika sem eru í boði fyrir fólk að loknu námi. Auk þess var tekið á móti fjölmennum hópi að Lynghálsi 4 í Reykjavík, höfuðstöðvum EFLU, í september en þangað mættu nemendur í Háskóla Íslands og Háskólanum í Reykjavík til að kynna sér starfsemi EFLU.
Stelpur, stálp og tækni
EFLA tók þátt í verkefninu Stelpur, stálp og tækni, þar sem 50 grunnskólanemendur heimsóttu höfuðstöðvar fyrirtækisins í maí. Markmiðið var að hvetja stúlkur og stálp til að skoða möguleika í tækninámi og -störfum, og þar með rjúfa staðalímyndir um iðnaðinn.
Heimsókn til Danmerkur
EFLA hélt áfram að styrkja tengsl við Danmörku á árinu, þar sem fyrirtækið opnaði skrifstofu í Kaupmannahöfn. Í október fylgdu Sæmundur Sæmundsson, framkvæmdastjóri, og Birta Kristín Helgadóttir, sviðsstjóri orku, forseta Íslands í heimsókn til Danmerkur. Með áherslu á græna orku, sjálfbærni og nýsköpun var heimsóknin liður í að efla samstarf við danska samstarfsaðila um orkuskipti og sjálfbæra þróun.
Verndun innviða á Reykjanesi
Forsetahjónin fyrrverandi, Guðni Th. Jóhannesson og Eliza Reid, tóku á móti starfsfólki EFLU og annarra fyrirtækja í júlí til að þakka framlag þeirra við verndun innviða á Reykjanesi vegna náttúruvár. Um tuttugu fulltrúar EFLU mættu á viðburðinn.
Verk og vit
EFLA var áberandi á fagsýningunni Verk og vit sem haldin var í Laugardalshöll í apríl. Þemað í kynningarbási EFLU, „Nýtum allt til góðra verka“, var tileinkað endurnýtingu byggingarefna í ýmsum byggingarverkefnum. Básinn var unninn í samstarfi við listamennina Adrian Frey Rodriguez og Narfa Þorsteinsson frá Verkvinnslunni og vakti mikla athygli. Básinn var að öllu leyti unninn úr úrgangsefniviði að slökkvitækjum undanskildum. Efniviður bássins var nýttur áfram eftir lok sýningarinnar.
Lagarlíf
Starfsfólk EFLU sótti Lagarlíf, ráðstefnu um eldi og ræktun, sem haldin var í Hörpu. Fyrirtækið tók einnig þátt í Framadögum sem haldnir voru í Háskólanum í Reykjavík, tæknideginum á UTmessunni í Hörpu og Fagþingi Samorku í Hveragerði.
Stóreldhúsið
EFLA kynnti Matarspor, umhverfisvænan þjónustuvef, á Stóreldhúsinu, árlegri fagsýningu sem haldin var í Laugardalshöll. Matarspor gerir mötuneytum og matsölustöðum kleift að reikna kolefnisspor og bera saman næringargildi ólíkra rétta. Fjöldi gesta kynnti sér lausnina og Sigurður Loftur Thorlacius, umhverfisverkfræðingur, flutti áhugaverðan fyrirlestur um umhverfisáhrif matar og Matarspor.
Iceland Geothermal Conference
Starfsfólk EFLU sótti einnig Iceland Geothermal Conference, sem var haldin í maí, þar sem ráðstefnugestir fengu innsýn í umfangsmikla þekkingu EFLU á sviði jarðvarma. Í júní stóð fyrirtækið fyrir rafrænni kynningu sem fjallaði um möguleika til að draga úr kolefnislosun í byggingariðnaði, hluta af norrænu samstarfsverkefni. Lesið nánar hér.
Arctic Circle
EFLA stóð fyrir málstofu á Arctic Circle-ráðstefnunni undir heitinu „Ensuring Stable and Reliable Operation of Future Sustainable Power Grids“. Fundurinn fjallaði um áskoranir í tengslum við nýtingu vindorku í litlum og einangruðum orkukerfum eins og því íslenska. Hjörtur Jóhannsson, rafmagnsverkfræðingur hjá EFLU, stóð fyrir pallborðsumræðum sem vöktu mikinn áhuga fundargesta.
Hafnasambandsþing
Hafnasambandsþing var haldið á Akureyri, þar sem verkfræðingar EFLU kynntu hugmyndir um orkuhafnir til grænnar framtíðar.
Alþjóðlegir viðburðir
Fulltrúar EFLU voru áberandi á alþjóðlegum viðburðum á árinu, þar á meðal HYDRO 2024 í Graz í Austurríki, sem fjallaði um vatnsaflsvirkjanir. Birta Kristín Helgadóttir og Helga Jóhanna Bjarnadóttir sóttu COP29-ráðstefnuna í Bakú og tóku þátt í umræðu um loftslagsvá.
Lesið meira um HYDRO 2024 hér.
Umfjöllun
EFLA var í brennidepli í alþjóðlega tímaritinu Agri Business Review í febrúar, þar sem vaxandi hlutverk fyrirtækisins í fiskeldi á landi var kynnt til sögunnar. Landeldi er nýlegur valkostur sem EFLA hefur unnið að í samstarfi við hagsmunaaðila. Lausnir fyrirtækisins bjóða upp á betri stjórn á vatnsgæðum og draga úr umhverfisáhættu, sem er mikilvægt framfaraskref í þessari vaxandi atvinnugrein.
EFLA kom að vinnu við nýjan Grindavíkurveg sem lagður var yfir nýtt hraun eftir eldgos á Reykjanesskaga. Jón Haukur Steingrímsson, jarðverkfræðingur hjá EFLU, sagði verkefnið hafa verið einstaka áskorun þar sem hraunflekarnir sköpuðu óvenjulegar aðstæður.
Reynir Sævarsson, hjá viðskiptaþróun EFLU, var í viðtali í maí þar sem hann ræddi mikilvægi samræmdra viðmiða um uppbyggingu á áhættusvæðum, ekki síst í ljósi náttúruhamfara sem orðið hafa í landinu síðustu ár. Reynir benti á að slík viðmið væru grundvöllur sjálfbærs skipulags og uppbyggingar.
Í júní kynnti Sigurður Loftur Thorlacius uppfærslu á Matarspori í Morgunblaðinu. Í júlí var Sigurður einnig í fjölmiðlum að ræða vistferilsgreiningu fyrir Coda Terminal, stórtækt verkefni í nýsköpun. Með vistferilsgreiningu er hægt að meta umhverfisáhrif framkvæmdar frá fyrstu stigum hönnunar, sem veitir mikilvæga innsýn í sjálfbæra þróun framkvæmdarinnar.
Í nóvember var Ágústa Loftsdóttir, sérfræðingur í orkumálum hjá EFLU, í viðtali í Kastljósi á RÚV. Þar ræddi hún um stöðu orkumála í aðdraganda alþingiskosninga og hvað kjósendur ættu að hafa í huga þegar þeir skoða stefnu stjórnmálaflokka í þessum mikilvæga málaflokki. Umræðan undirstrikaði mikilvægi skynsamlegrar orkunýtingar og stefnumörkunar á Íslandi.