Menning

Aukin áhersla var lögð á móttöku nýs starfsfólks á árinu enda skiptir vandað móttökuferli mjög miklu máli. Það hvernig tekið er á móti nýju starfsfólki getur haft mikil áhrif á líðan þess og síðar helgun í starfi. Á árinu 2024 hófu rúmlega hundrað starfsmenn störf hjá EFLU hf. Móttökuferlið er skilgreint sem tveggja ára ferli. Kallað er eftir upplifun starfsfólks með reglubundnum könnunum á tímabilinu, auk þess sem öllu nýju starfsfólki stendur til boða að hitta mannauðssérfræðing til að ræða það sem vel er gert sem og það sem betur má fara í nýliðaferlinu. Unnið er að endurskoðun og þróun á nýliðakynningum.

EFLA leggur metnað sinn í að hlúa að heilsu og vellíðan starfsfólks og hefur verið í hópi heilsueflandi vinnustaða á Íslandi frá upphafi verkefnisins árið 2020. Um er að ræða verkefni á vegum Embættis landlæknis, Vinnueftirlitsins og VIRK. Heilsueflandi vinnustaður er sameiginlegt verkefni vinnuveitenda, starfsfólks og samfélagsins og nær til félagslegra, andlegra og líkamlegra þátta sem stuðla að vellíðan einstaklings.

Árlega er lagt mat á stöðu EFLU í samræmi við viðmið Embættis landlæknis og VIRK, auk þess sem kallað er eftir upplifun starfsfólks í árlegri vinnustaðakönnun. Markmið verkefnisins er að skapa umhverfi og aðstæður í vinnuumhverfi starfsfólks sem stuðla að heilsusamlegum lifnaðarháttum, heilsu og vellíðan, svo sem hollu mataræði, hreyfingu, góðu vinnuumhverfi og góðum samskiptum.

Vellíðan

Vellíðan starfsfólks er mikilvæg og mikil áhersla er lögð á góðan starfsanda sem byggir á sálfræðilegu öryggi og góðri teymisvirkni. Þar skiptir miklu máli að traust ríki í teymum þar sem starfsfólk getur sagt hug sinn af einlægni og skipst á hugmyndum og aðferðum á uppbyggilegan máta. Teymisvirkni og samábyrgð ýtir undir samvinnu þar sem starfsfólk leitar hvert til annars og deilir þekkingu sinni og reynslu. Einelti og áreitni eru ekki liðin hjá EFLU og lögð er áhersla á fræðslu og þjálfun um málaflokkinn. Árlega eru framkvæmdar EKKO- (einelti, kynferðisleg og kyndbundin áreitni og ofbeldi) og vellíðunarkannanir, niðurstöður kynntar fyrir starfsfólki og gripið til aðgerða eftir þörfum. Niðurstöður mælinga sýna að EKKO mál eru í lágmarki hjá fyrirtækinu (0-1%) auk þess sem spurningar sem snúa að vellíðan, virðingu í samskiptum og stuðningi frá stjórnendum mælast mjög hátt. Áfram var kapp lagt á að koma sem best til móts við starfsfólk í formi sveigjanleika, heimavinnu, góðs upplýsingaflæðis og fræðslu, svo dæmi séu nefnd. Á árinu var lögð áhersla á að styrkja og viðhalda góðum tengslum við starfsfólk í fæðingarorlofi.

Jafnrétti

Jafnréttis- og jafnlaunastefna EFLU byggir á þeirri grundvallarhugsun að allt starfsfólk njóti jafnréttis, óháð kyni, uppruna eða trú. EFLA hlaut jafnlaunavottun samkvæmt jafnlaunastaðlinum ÍST 85:2012 árið 2019. Eitt af markmiðum EFLU er að enginn launamunur sé á milli kynjanna sem og að launamunur mælist aldrei hærri en 1%. Niðurstöður síðustu launagreiningar sýndu að óútskýrður launamunur var um 0,7% konum í óhag, en árið áður mældist munurinn 0,2% körlum í óhag. Hjá EFLU er enginn starfsmaður skráður kynhlutlaus í þjóðskrá og því er samanburðurinn einungis á milli tveggja kynja, þ.e. karla og kvenna. EFLA hlaut þriðja árið í röð viðurkenningu Jafnvægisvogarinnar fyrir að vera eitt af þeim fyrirtækjum sem hafa undirritað viljayfirlýsingu um jafnt kynjahlutfall í framkvæmdastjórn félagsins.

Andleg og líkamleg heilsa starfsfólks

EFLA leggur áherslu á að hlúa vel að andlegri og líkamlegri heilsu starfsfólks. EFLA hvetur starfsfólk til heilbrigðra lífshátta og umhverfisvæns ferðamáta og reynt er að gera starfsfólki þetta mögulegt og aðgengilegt eins og hægt er. Á árinu 2025 fengu um 72% starfsfólks greiddan íþrótta- eða hreyfingarstyrk og um 21% starfsfólks hafði gert samgöngusamning. Árlega eru framkvæmdar heilsufarsmælingar á starfsstöðvum EFLU fyrir þau sem það kjósa, auk þess sem boðið er upp á flensusprautu að hausti. Í höfuðstöðvum EFLU er góð aðstaða fyrir starfsfólk til íþróttaiðkunar, tímar í hreystiþjálfun og annars konar líkamsrækt hafa verið í boði og aðstaða fyrir heilsunuddara. Hvíldarherbergi er til staðar á flestum starfsstöðum, þar sem starfsfólk getur kúplað sig út úr verkefnum dagsins með stuttri hvíld, nýtt sér nuddtæki og slakað á. EFLA hefur hlotið gullvottun sem hjólavænn vinnustaður. Vottunin hvetur vinnustaði til að bæta aðbúnað hjólreiðafólks, bæði fyrir viðskiptavini og starfsfólk, og hvetja þannig fleiri til að velja umhverfisvæna og heilbrigða ferðamáta í daglegu lífi. Lögð er áhersla á að gera starfsfólki kleift að hlúa að andlegri heilsu og starfsfólki veitt aðstoð ef það óskar eftir henni.

EFLA framkvæmir reglulega vinnustaðakannanir í samstarfi við Gallup. Í könnununum er meðal annars helgun starfsfólks mæld sem og starfsánægja, auk ýmissa annarra atriða sem snúa að líðan og upplifun starfsfólks í vinnuumhverfi sínu. Mæling á helgun starfsfólks byggir á tólf lykilþáttum sem tengjast bæði líðan starfsfólks og rekstrarlegum þáttum. Niðurstöður mælinga á helgun starfsfólks hjá EFLU árið 2025 voru 4,35 af 5 mögulegum, sem er hækkun um 0,19 punkta frá árinu á undan. Starfsánægja hjá EFLU mælist há og hækkaði einnig milli ára úr 4,39 í 4,49 af 5 mögulegum. Snerpusamtöl eru framkvæmd þrisvar á ári þar sem starfsfólki gefst kostur á samtali við fyrirliða síns teymis um líðan í starfi, starfsþróun eða annað sem brennur á viðkomandi hverju sinni. Mikil ánægja er með snerpusamtölin hjá starfsfólki en um 80% starfsfólk segist vera mjög eða frekar ánægt með samtölin samkvæmt starfsmannakönnunum. Þá er þátttökuhlutfall þeirra sem fara í snerpusamtöl mjög hátt hjá EFLU eða nálægt 90%.

Öflungur er starfsmannafélag EFLU á Íslandi og óhætt er að segja að félagsstarf starfsfólks sé afar fjölbreytt. Lögð er áhersla á að viðburðir mæti ólíkum þörfum starfsfólks og að þeir séu fjölskylduvænir. Hlutverk Öflungs er m.a. að vinna að íþrótta-, félags- og menningarmálum starfsfólks og efla samstarf og samvinnu þess. Aðild að starfsmannafélagi er valkvæð en mikill meirihluti starfsfólks EFLU er skráð í félagið. Mikil gróska var í starfi Öflungs á árinu og boðið var upp á fjölbreytta viðburði og dagskrá fyrir starfsfólk.

EFLA skipulagði að hausti 2025, í samstarfi við Öflung, vel heppnaða árshátíðarferð til Króatíu þar sem rúmlega 600 manns skemmtu sér saman, nutu samveru og

ræktuðu tengsl.

Viðburðir fyrir starfsfólk:

• Embla - Samverudagur EFLU
• Árshátíð
• Fjölskyldustund í aðventunni, Aðventustund
• Aðventukvöld
• Reglulegir viðburðir þar sem leitast er eftir að styðja við stefnu félagsins, til dæmis með því að styrkja tengsl, auka vellíðan og samfélagslega ábyrgð.

Heilsa og öryggi eru órjúfanlegur hluti af starfsemi EFLU og byggist þetta á þroskaðri öryggismenningu og stjórnkerfi sem er vottað samkvæmt ISO 45001. Áhersla er lögð á markvissa áhættustýringu, forvarnir og stöðugar umbætur, með virkri þátttöku starfsfólks þvert á svið og svæði. Þá er starfsfólk ávallt hvatt til að gæta að öryggi sínu og annars starfsfólks. Áhættumat og vinnulýsingar hafa verið gerðar fyrir öll helstu störf hjá EFLU, bæði innan skrifstofunnar og vegna vinnu á mismunandi verkstöðum. Allur nauðsynlegur öryggisbúnaður er til staðar fyrir starfsfólk og er hann CE-merktur. Til að auka öryggisvitund og draga úr áhættu er starfsfólki gert að skima fyrir hættum þegar farið er á verkstað, með því að nota snjallforrit sem inniheldur stuttan lista yfir helstu öryggisatriði og viðbúnað.

Á árinu urðu tvö skráningarskyld slys, bæði tengd vinnu á vettvangi. Hvorugt þessara slysa var alvarlegt. Sem hluti af forvarnarstarfi EFLU er starfsfólk hvatt til að skrá atvik sem hefðu getað leitt til slysa; sjö slík atvik voru skráð á árinu og nýtast þau sem mikilvægt innlegg til frekari áhættuminnkunar. EFLA er staðráðin í að viðhalda öruggu og heilsusamlegu vinnuumhverfi fyrir allt starfsfólk og samstarfsaðila.

Öryggisnefndir eru starfandi á öllum starfsstöðvum EFLU. Í öryggisnefndum sitja annars vegar öryggistrúnaðarmenn sem kosnir eru af starfsfólki og hins vegar öryggisverðir sem valdir eru af EFLU. Helsta hlutverk öryggisnefnda er að vinna að bættum aðbúnaði, hollustuháttum og öryggi í allri starfsemi fyrirtækisins og fylgjast með því að ráðstafanir á þessu sviði séu gerðar og skili tilætluðum árangri. Þær sjá jafnframt um vöktun á öryggisbúnaði, öryggiskerfum á starfsstöðvum og brunaöryggi. Nefndirnar eru mjög virkar og taka þær þátt í öllum helstu ákvörðunum um öryggismál EFLU.

EFLU er umhugað um öryggi persónugreinanlegra upplýsinga viðskiptavina og starfsfólks síns og einsetur sér að tryggja áreiðanleika, trúnað og öryggi þeirra gagna sem unnið er með innan fyrirtækisins. EFLA vinnur samkvæmt núgildandi persónuverndarlöggjöf og persónuverndarstefnu.