Samfélagsleg ábyrgð
Áhersla EFLU á samfélagslega ábyrgð hefur vaxið jafnt og þétt og er nú orðin rauður þráður í stefnumiðun fyrirtækisins.
Global Compact sáttmáli Sameinuðu þjóðanna
EFLA skrifaði undir Global Compact sáttmála Sameinuðu þjóðanna árið 2015 og skuldbatt sig þannig til að fylgja þeim tíu grundvallarviðmiðum sáttmálans um samfélagslega ábyrgð sem snúa að mannréttindum, vinnumarkaði, umhverfi og baráttu gegn spillingu.
Í þessari áttundu samfélagsskýrslu EFLU er tekinn saman árangur fyrirtækisins í samræmi við viðmið Global Compact. Áhersla fyrirtækisins á samfélagslega ábyrgð sína hefur vaxið jafnt og þétt og er hún nú orðin rauður þráður í stefnumiðum fyrirtækisins, sem og áhersluþáttur í þeirri ráðgjöf sem fyrirtækið veitir út á við.
Festa, miðstöð um sjálfbærni
EFLA er aðili að Festu, miðstöð um sjálfbærni, og var eitt af 103 íslenskum fyrirtækjum sem skrifaði undir sameiginlega yfirlýsingu fyrirtækja og stofnana um markmið í loftslagsmálum í nóvember 2015. EFLA skuldbindur sig til að taka þátt í hvatningu um ábyrgð í umhverfismálum heimsins og fylgir loftslagsstefnu sem hefur það að markmiði að draga úr losun gróðurhúsalofttegunda og minnka myndun úrgangs. Starfsfólk EFLU tekur þátt í vinnu sérfræðihóps Festu og leggur fram vinnu til að uppfæra Loftslagsmæli Festu.
Nordic Built og Grænni byggð
EFLA var fyrsta verkfræðistofan á Íslandi sem skrifaði undir sáttmála Nordic Built. Sáttmálinn hvetur til þróunar á samkeppnishæfum lausnum í vistvænni mannvirkjagerð. Markmið Nordic Built er að fá byggingariðnaðinn til að sameinast um að nýta sérþekkingu sína til að mæta aukinni eftirspurn eftir vistvænni mannvirkjagerð í heiminum og vera leiðandi í nýsköpun, grænum hagvexti og velferð. EFLA er einnig stofnaðili og þátttakandi í stjórn sem og virkur félagi í félagasamtökum Grænni byggðar, sem er vettvangur um sjálfbæra þróun byggðar með það að markmiði að lágmarka umhverfisáhrif frá mannvirkjagerð, rekstri og niðurrifi.
Samfélagssjóður
Samfélagssjóður EFLU veitir árlega styrki til uppbyggjandi og jákvæðra verkefna sem nýtast samfélaginu. Markmiðið er að styðja framtak einstaklinga og hópa sem stuðla að farsælli þróun samfélagsins, lífsgæðum og fjölbreyttu mannlífi. Umsóknir eru metnar út frá markmiðum sjóðsins, markmiðum EFLU og áherslum valnefndarinnar hverju sinni.
Árið 2023 voru veittir sex styrkir úr sjóðnum. Verkefnin voru af fjölbreyttum toga og flokkuðust til góðgerðar- og félagsmála, menntamála, íþrótta- og æskulýðsmála og menningu og lista. Hægt er að lesa nánar um verkefni sem hlutu styrki hér fyrir neðan.
Kraftur stuðningsfélag
Kraftur er stuðningsfélag fyrir ungt fólk sem greinst hefur með krabbamein og aðstandendur þeirra. Kraftur hlaut 500.000 kr. styrk fyrir fjölskylduviðburði á vegum félagsins. Viðburðirnir eru boðnir félagsmönnum Krafts að kostnaðarlausu og eru hugsaðir til að skapa vettvang þar sem fjölskyldur geta komið saman og átt góðar stundir þrátt fyrir þær hindranir sem þau eru að takast á við.
Vox Feminae
Kvennakórinn Vox Feminae hlaut 450.000 kr. styrk til örtónleikahalds á hjúkrunarheimilum á höfuðborgarsvæðinu. Í lok hverra tónleika verður efnt til samsöngs heimilsfólks, starfsfólks og kórkvenna. Kórinn fagnar þrjátíu ára starfsafmæli í ár og er örtónleikaröð á hjúkrunarheimilum ein leið til að fagna þeim tímamótum.
STEM Húsavík
STEM Húsavík hlaut 400.000 kr. styrk fyrir Forritunarklúbb STEM fyrir börn á aldrinum 8-14 ára og þátttöku klúbbsins í FIRST Lego League forritunarkeppninni. STEM Húsavík var sett á fót í maí 2022 og er fyrsta STEM (Science, Technology, Engineering, Math) námsvistakerfið á Íslandi þar sem sérstökl áhersla er lögð á samfélagsþátttöku.
Körfuknattleiksdeild Skallagríms
Körfuknattleiksdeild Skallagríms hlaut 350.000 kr styrk fyrir kaupum á skotvél sem hefur þann tilgang að grípa fráköst og senda boltann til baka á leikmenn. Vélin er notuð í þjálfun á öllum aldursstigum og skapar stórbætta aðstöðu fyrir einstaklinga sem vilja bæta körfuknattleik sinn.
Fjölskylduhjálp Íslands
Fjölskylduhjálp Íslands, sem fagnar 20 ára starfsafmæli á árinu, hlaut 200.000 kr styrk fyrir matarsöfnun fyrir fjölskyldur í landinu.
Félagsfærnifjör
Íunn Eir Gunnarsdóttir hlaut 100.000 kr styrk fyrir útgáfu á kennsluhandbókinni Félagsfærnifjör. Tilgangur kennsluhandbókarinnar er að veita fagfólki verkfæri til að kenna börnum félagsfærni og byggir á kenningum um nám, hópastarf, hlutverk, leiðbeinenda og áhrif jafningja. Íunn Eir tók við styrknum á starfsstöð okkar á Akureyri af Hjalta Má Bjarnasyni svæðisstjóra okkar á EFLU Norðurlandi.
Votlendissjóður
EFLA er einn af stofnaðilum Votlendissjóðs og er þátttakandi í stjórn sjóðsins. EFLA hefur meðal annars tekið þátt í að móta aðferðafræðina við mat á árangri endurheimtar votlendis og útfærslu vöktunar.
Háskólasamfélagið
EFLA leggur mikið upp úr góðum tengslum við háskólasamfélagið, bæði með því að leggja til starfsfólk til að sinna hlutverki leiðbeinanda í lokaverkefnum og því að sinna stundakennslu í háskólunum. Sem fulltrúi atvinnulífsins hefur EFLA á árinu tekið virkan þátt í endurmati Háskóla Íslands á rannsóknarstefnu á Verkfræði- og náttúruvísindasviði sem og pallborðsumræðu á ráðstefnu um gæði meistaranáms háskólanna á Íslandi: „Annual quality board conference on enhancing qualilty of masters studies“. EFLA hefur gert samstarfssamning við háskólana og tekur við nemendum í starfsþjálfun til að sinna ákveðnum verkefnum.
Árlega sækir EFLA um styrki í Nýsköpunarsjóð námsmanna og á síðasta ári hlutu fjögur verkefni brautargengi úr sjóðnum. EFLA leggur áherslu á að laða að efnilega háskólanema og mögulegt framtíðarstarfsfólk til starfa og síðasta sumar voru 45 háskólanemar ráðnir til fyrirtækisins.